മോന്സന്റെ കൂട്ടാളിയായ സന്തോഷ് തിരുവനന്തപുരത്ത് നിരവധി പേരിൽ നിന്ന് പണം തട്ടിയതായി പരാതി. രണ്ട് കോടിയിലധികം രൂപ വാങ്ങിയിട്ട് തിരിച്ചു നല്കിയില്ലെന്നാണ് ആരോപണം.
കിളിമാനൂരില് സന്തോഷ് താമസിച്ച വീടിന് സമീപത്തുള്ള സ്ത്രീയാണ് സുജാത. ഇവരില് നിന്ന് പല തവണയായി 29 ലക്ഷത്തോളം രൂപ സന്തോഷ് വാങ്ങിയിരുന്നു. ഇതിന് രേഖയായി ചെക്കുകളും നല്കി. പലവട്ടം പണം തിരികെ ലഭിക്കുന്നതിനായി സന്തോഷിനെ സമീപിച്ചെങ്കിലും ഫലമൊന്നും ഉണ്ടായില്ലെന്ന് സുജാത പറഞ്ഞു.
കിളിമാനൂര് ഭാഗത്ത് ഇങ്ങനെ പലരില് നിന്നായി 2 കോടിയോളം രൂപയാണ് സന്തോഷ് കൈക്കലാക്കിയത്. മോന്സന്റെ കയ്യില് നിന്നും ശേഖരിച്ച പുരാവസ്തുക്കളും നാണയങ്ങളും കാട്ടിയായിരുന്നു സുഹൃത്തുക്കളില് നിന്നടക്കം പണം വാങ്ങിയത്. പിന്നീട് പലരും പണം തിരികെ ആവശ്യപ്പെട്ടതോടെ സന്തോഷ് കുടുംബവുമായി നാട് വിടുകയായിരുന്നു. അതേസമയം മോന്സന്റെ കൈവശമുള്ള ഭൂരിഭാഗം പുരാവസ്തുക്കളും തന്റേതാണെന്നും ഈ വകയില് രണ്ട് കോടിയോളം രൂപ മോന്സണ് തരാനുണ്ടെന്നുമാണ് സന്തോഷിന്റെ വാദം.