മുണ്ടക്കൈ ദുരന്തം; 51 പേരുടെ പോസ്റ്റ്മോര്ട്ടം നടപടികള് പൂര്ത്തീകരിച്ചു
ചൂരല്മലയില് മദ്രസയിലും പള്ളിയിലും താത്ക്കാലിക ക്ലിനിക്കും പോളിടെക്നിക്കിൽ ആശുപത്രിയും സജ്ജമാക്കിയതായി മന്ത്രി വീണാ ജോർജ് അറിയിച്ചു
Update: 2024-07-30 13:02 GMT
കൽപ്പറ്റ: വയനാട്ടിലുണ്ടായ ഉരുൾപ്പൊട്ടലിൽ മരിച്ച 51 പേരുടെ പോസ്റ്റ്മോര്ട്ടം നടപടികള് പൂര്ത്തീകരിച്ചതായി ആരോഗ്യവകുപ്പ് മന്ത്രി വീണാ ജോർജ് അറിയിച്ചു. പോസ്റ്റുമോര്ട്ടം നടപടികള് വേഗത്തിലാക്കാന് വയനാടുള്ള ഫോറന്സിക് സംഘത്തെ കൂടാതെ കോഴിക്കോട് നിന്നുള്ള ഫോറന്സിക് ഡോക്ടര്മാരുടെ പ്രത്യേക സംഘത്തെ കൂടി നിയോഗിച്ചിരുന്നു. തിരിച്ചറിയാനാകാത്ത മൃതദേഹങ്ങള് തിരിച്ചറിയാന് ജനിതക പരിശോധനകള് നടത്താനുള്ള സംവിധാനമൊരുക്കിയിട്ടുണ്ട്. അധിക മോര്ച്ചറി സൗകര്യങ്ങളുമൊരുക്കിയതിന് പുറമെ മൊബൈല് മോര്ച്ചറി സൗകര്യങ്ങള് ക്രമീകരിച്ചതായും മന്ത്രി അറിയിച്ചു.
താത്ക്കാലിക ആശുപത്രികള് സജ്ജമാക്കുന്നതിന്റെ ഭാഗമായി ചൂരല്മലയില് മദ്രസയിലും പള്ളിയിലും താത്ക്കാലിക ക്ലിനിക്കും സജ്ജമാക്കി. പോളിടെക്നിക്കിൽ താല്ക്കാലിക ആശുപത്രി പ്രവര്ത്തനമാരംഭിച്ചതായും മന്ത്രി അറിയിച്ചു.
വയനാട് അധികമായി ആരോഗ്യപ്രവര്ത്തകരെ നിയോഗിച്ചു. കോഴിക്കോട്, കണ്ണൂര്, തൃശൂര് മെഡിക്കല് കോളേജുകളില് നിന്നുള്ള ടീമിനെ വയനാട്ടിലേക്ക് അയച്ചിട്ടുണ്ട്. കോഴിക്കോട്ട് നിന്നുള്ള രണ്ട് ടീം സ്ഥലത്തെത്തിയിട്ടുണ്ട്. സര്ജറി, ഓര്ത്തോപീഡിക്സ്, കാര്ഡിയോളജി, സൈക്യാട്രി, ഫോറന്സിക് തുടങ്ങിയ വിഭാഗങ്ങളിലെ ഡോക്ടര്മാരെയും നഴ്സുമാരേയും അധികമായി നിയോഗിച്ചു. സ്വകാര്യ ആശുപത്രികളിലെ ഡോക്ടർമാരുടെ സംഘത്തേയും നിയോഗിച്ചിട്ടുണ്ട്. ദുരന്ത മേഖലകളില് പ്രവര്ത്തന പരിചയമുള്ള ഡോക്ടര്മാരുടെ സംഘവും സ്ഥലത്ത് എത്തുമെന്നും മന്ത്രി അറിയിച്ചു.
ടെലിഫോണ് വഴിയുള്ള കൗണ്സലിങ്ങിനും മറ്റു മാനസികാരോഗ്യ സേവനങ്ങള്ക്കുമായി ‘ടെലി മനസ്’ ശക്തിപ്പെടുത്തി. ടെലി മനസ് ടോള്ഫ്രീ നമ്പരില് (14416) 24 മണിക്കൂറും സേവനം ലഭ്യമാക്കി. ആരോഗ്യവകുപ്പ് ഡയറക്ടറേറ്റില് ആരംഭിച്ച സ്റ്റേറ്റ് കണ്ട്രോള് റൂം 24 മണിക്കൂറാക്കി. 0471 2303476, 0471 2300208 എന്നീ നമ്പരുകളില് വിളിക്കാമെന്നും മന്ത്രി അറിയിച്ചു.