'തപാല് വോട്ടുകള് പൊട്ടിച്ച് തിരുത്തിയിട്ടുണ്ട്,തെരഞ്ഞെടുപ്പ് കമ്മീഷന് കേസെടുത്താലും പ്രശ്നമില്ല'; ജി.സുധാകരൻ
സിപിഎം സ്ഥാനാർഥിക്ക് വേണ്ടി വോട്ട് തിരുത്തിയെന്നും വെളിപ്പെടുത്തല്
Update: 2025-05-15 04:30 GMT
ആലപ്പുഴ: തപാൽ വോട്ടുകൾ പൊട്ടിച്ച് തിരുത്തിയിട്ടുണ്ടെന്ന വെളിപ്പെടുത്തലുമായി മുതിർന്ന സിപിഎം നേതാവ് ജി.സുധാകരൻ. 1989 ലെ ലോക്സഭ തെരഞ്ഞെടുപ്പിൽ സിപിഎം സ്ഥാനാർത്ഥിക്ക് വേണ്ടിയാണ് തിരുത്തിയത്.
ഇതിന്റെ പേരിൽ തെരഞ്ഞെടുപ്പ് കമ്മീഷൻ കേസെടുത്താൽ പ്രശ്നമില്ലെന്നും സുധാകരൻ പറഞ്ഞു. ആലപ്പുഴയിൽ എൻജിഒ യൂണിയൻ സംഘടിപ്പിച്ച പരിപാടിയിലാണ് വിവാദ പരാമർശം.
'1989 ൽ കെ.വി. ദേവദാസ് ആലപ്പുഴയിൽ എൽഡിഎഫ് സ്ഥാനാർഥിയായി മത്സരിച്ചപ്പോൾ ഇലക്ഷന് കമ്മിറ്റി സെക്രട്ടറിയായിരുന്നു ഞാന്.പോസ്റ്റൽ ബാലറ്റ് ശേഖരിച്ച് സി പി എം ജില്ലാ കമ്മിറ്റി ഓഫീസിൽ കൊണ്ടുവന്നു. അവിടെ വെച്ച് ഞാനുള്പ്പടെയുള്ളവര് പോസ്റ്റല് വോട്ടുകള് പൊട്ടിച്ചു തിരുത്തിയിട്ടുണ്ട്.അന്നു സിപിഎം സര്വീസ് സംഘടനകളിലെ അംഗങ്ങളുടെ വോട്ടില് 15 ശതമാനം ദേവദാസിന് എതിരായിരുന്നു.അംഗങ്ങളുടെ പോസ്റ്റൽ ബാലറ്റുകളിൽ 15 ശതമാനം മറിച്ചു ചെയ്തു.'സുധാകരന് പറഞ്ഞു.
വക്കം പുരുഷോത്തമനെതിരെയാണ് അന്നു ദേവദാസ് മത്സരിച്ചത്. കാല്ലക്ഷത്തില്പരം വോട്ടുകളുടെ ഭൂരിപക്ഷത്തിലാണു വക്കം പുരുഷോത്തമന് അന്ന് വിജയിച്ചത്.