യൂറോപ്യൻ രാജ്യങ്ങളിലേക്ക് വിസ വാഗ്ദാനം ചെയ്ത് ലക്ഷങ്ങളുടെ തട്ടിപ്പ്: റിക്രൂട്ടിംഗ് ഏജൻസി ഉടമകൾക്കായി തെരച്ചിൽ

കണ്ണൂര്‍: യൂറോപ്യൻ രാജ്യങ്ങളിലേക്ക് വിസ വാഗ്ദാനം ചെയ്ത് തട്ടിപ്പ് നടത്തിയ കണ്ണൂർ തളിപ്പറമ്പിലെ റിക്രൂട്ടിംഗ് ഏജൻസി ഉടമകൾക്കായി തെരച്ചിൽ ഊർജിതമാക്കിയതായി പൊലീസ്. സ്റ്റാർ ഹൈറ്റ്സ് കൺസൾട്ടൻസി ഉടമകളായ പി പി കിഷോർ കുമാർ, കിരൺ കുമാർ എന്നിവർക്കെതിരെ വിവിധ പരാതികളിലായി 6 കേസുകൾ രജിസ്റ്റർ ചെയ്തിട്ടുണ്ട്.

സംസ്ഥാനത്തിന്റെ വിവിധ ഭാഗങ്ങളിൽ നിന്നായി ഒട്ടേറെ പേരാണ് തട്ടിപ്പിനിരയായത്. 6 ലക്ഷം മുതൽ 13 ലക്ഷം രൂപ വരെ നിരവധി ഉദ്യോഗാർത്ഥികളിൽ നിന്ന് കൈപ്പറ്റി വഞ്ചിച്ചെന്നാണ് പരാതി. തട്ടിപ്പിനിരയായ വയനാട് ബത്തേരി തൊടുവട്ടി സ്വദേശി അനൂപ് ടോമി കഴിഞ്ഞ മാസം 27ന് ആത്മഹത്യ ചെയ്തിരുന്നു. അനൂപിന്റെ പിതാവും ഏജൻസിക്കെതിരെ പൊലീസിൽ പരാതി നൽകിയിട്ടുണ്ട്.