ദമ്പതികൾ തമ്മിൽ വഴക്കുണ്ടാവുക സ്വാഭാവികമാണ്. ഇങ്ങനെ പിണങ്ങിയിരിക്കുമ്പോൾ അടുത്ത സുഹൃത്തുക്കളോടോ മാതാപിതാക്കളോടോ സഹോദരങ്ങളോടോ ആയിരിക്കും സങ്കടം പങ്കുവയ്ക്കുന്നത്. കൂടുതൽ പേരും ഉറ്റ സുഹൃത്തുക്കളുടെ മുന്നിലായിരിക്കും മനസ് തുറക്കുക. എന്നാൽ എത്ര അടുത്ത കൂട്ടുകാരാണെങ്കിലും പങ്കാളികൾ രണ്ടുപേർക്കിടയിൽ മാത്രം സൂക്ഷിക്കേണ്ടതും പുറത്തു പറയാൻ പാടില്ലാത്തതുമായ കാര്യങ്ങളുണ്ട്.
നിങ്ങൾ തമ്മിലുള്ള വലിയ വഴക്കുകളുടെ വിശദാംശങ്ങൾ
ഞങ്ങൾ തമ്മിൽ വഴക്കുണ്ടായി എന്ന് പറയുന്നതിൽ പ്രശ്നമില്ല. എന്നാൽ ഭാര്യയോ ഭര്‍ത്താവോ പറഞ്ഞ ഓരോ വാക്കുകളോ അവരുടെ ദേഷ്യത്തെക്കുറിച്ചോ വിശദീകരിച്ച് സുഹൃത്തിനോട് പറയരുത്. പങ്കാളിയുമായുള്ള നിങ്ങളുടെ വഴക്ക് പെട്ടെന്ന് മാറിയേക്കാം. നിങ്ങൾ പഴയ പോലെ സ്നേഹത്തിലാവുകയും ചെയ്യും. പക്ഷെ കൂട്ടുകാരനോ കൂട്ടുകാരിയോ ഇത് മറന്നെന്ന് വരില്ല. നിങ്ങൾ എന്താണോ പങ്കാളിയെക്കുറിച്ച് പറഞ്ഞത് അതായിരിക്കും അയാളുടെ മനസിൽ വരിക. പിന്നീടൊരിക്കൽ അതേ കൂട്ടുകാരുടെ മുന്നിലേക്ക് പങ്കാളിയെക്കൂട്ടി നിങ്ങൾ ചെല്ലുമ്പോൾ അത് വളരെ അസ്വസ്ഥതയുണ്ടാക്കുന്ന ഒരു സാഹചര്യമായി മാറും. ഓർക്കുക, നിങ്ങൾക്കിടയിലെ എല്ലാ അഭിപ്രായവ്യത്യാസങ്ങൾക്കും സാക്ഷികളോ മധ്യസ്ഥരോ ഉണ്ടാകേണ്ടതില്ല.
പങ്കാളിയുടെ ഏറ്റവും വലിയ അപകർഷതാബോധങ്ങളും ഭയങ്ങളും
സ്വന്തം മാതാപിതാക്കളോട് പോലും തുറന്നുപറയാത്ത സ്വകാര്യമായ കാര്യങ്ങൾ, അനുഭവങ്ങൾ എന്നിവ നിങ്ങളോട് പങ്കാളി തുറന്നുപറഞ്ഞിട്ടുണ്ടാകാം. അത് സ്വന്തം രൂപത്തെക്കുറിച്ചോ, കരിയറിനെക്കുറിച്ചോ, കുടുംബത്തെക്കുറിച്ചോ, സാമ്പത്തിക സ്ഥിതിയെക്കുറിച്ചോ അല്ലെങ്കിൽ ഭൂതകാലത്തിലെ എന്തെങ്കിലും അനുഭവങ്ങളെക്കുറിച്ചോ ഉള്ള ഭയങ്ങളാകാം. ഒരുപക്ഷേ ഇന്ന് ചിരിയോടെ സംസാരിക്കുന്ന കാര്യങ്ങളാണെങ്കിൽ പോലും, ആദ്യമായി അത് നിങ്ങളോട് പറയുമ്പോൾ അവർ അത്രയധികം മാനസികമായി തളർന്നിട്ടുണ്ടാകാം. ഒരാൾ ഇത്തരത്തിലുള്ള കാര്യങ്ങൾ നിങ്ങളോട് പങ്കുവെക്കുമ്പോൾ, അവരുടെ മനസ്സിന്റെ ഏറ്റവും മൃദുവായ, ആയ ഒരു വശമാണ് നിങ്ങളുടെ കൈകളിൽ വിശ്വസിച്ച് ഏൽപ്പിക്കുന്നത്. അത്തരം കാര്യങ്ങൾ കൂട്ടുകാരോട് പറയുന്നത് വിശ്വാസം തകര്‍ക്കും.
സ്വകാര്യ നിമിഷങ്ങൾ
ദമ്പതികൾ പരസ്പരം പങ്കുവയ്ക്കുന്ന സ്വകാര്യ സംഭാഷണങ്ങൾ, സ്നേഹനിമിഷങ്ങൾ, നിങ്ങൾക്കിടയിൽ മാത്രം സംഭവിക്കുന്ന കാര്യങ്ങൾ എന്നിവ ഒരിക്കലും മറ്റുള്ളവരോട് പങ്കുവയ്ക്കരുത്. മറ്റുള്ളവര്‍ക്കിടയിൽ അത് ചര്‍ച്ചാവിഷയമാകുന്നതോടെ ആ ബന്ധത്തിന്‍റെ മനോഹാരിതയാണ് നഷ്ടപ്പെടുന്നത്. നിങ്ങളുടെ സുഹൃത്തിന് ദുരുദ്ദേശമൊന്നുമില്ലെങ്കിൽ പോലും, തങ്ങളുടെ വ്യക്തിപരമായ കാര്യങ്ങൾ മറ്റൊരാൾക്ക് ആസ്വദിക്കാനുള്ള ഒരു കഥയായി മാറി എന്ന് അറിയുന്നത് പങ്കാളിക്ക് വിഷമമുണ്ടാക്കാം.
നിങ്ങളുടെ ബന്ധത്തെക്കുറിച്ച് സുഹൃത്തുക്കളോട് സംസാരിക്കുന്നതിൽ തെറ്റൊന്നുമില്ല. എന്നാൽ, പങ്കാളിയുമായി നിങ്ങൾ എത്രത്തോളം അടുപ്പത്തിലാണെന്ന് പറയുന്നതും, ആ അടുപ്പത്തിന്‍റെ തികച്ചും സ്വകാര്യമായ തലങ്ങളിലേക്ക് മറ്റുള്ളവർക്ക് പ്രവേശനം നൽകുന്നതും തമ്മിൽ വലിയ വ്യത്യാസമുണ്ട്.
പങ്കാളിയുടെ കുടുംബത്തെക്കുറിച്ച് പറയുന്നത്
പ്രത്യേക സാഹചര്യത്തിൽ പങ്കാളി അവരുടെ മാതാപിതാക്കളെക്കുറിച്ച് പരാതി പറയുകയോ, വഴക്കിന് ശേഷം സഹോദരങ്ങളോട് ദേഷ്യപ്പെടുകയോ ചെയ്തേക്കാം. എന്നാൽ അതിന്റെ അർത്ഥം ആ വിവരങ്ങളെല്ലാം മറ്റെല്ലാവരും അറിയണമെന്നല്ല. സങ്കടമോ വിഷമമോ തോന്നുമ്പോൾ മനുഷ്യർ പെട്ടെന്ന് പലതും പറഞ്ഞേക്കാം, എന്നാൽ പിന്നീട് കാര്യങ്ങളെ അവർ മറ്റൊരു രീതിയിലാകും കാണുന്നത്. രാത്രി അമ്മയോട് ദേഷ്യപ്പെട്ട ഒരാൾ അടുത്ത ദിവസം രാവിലെ തികച്ചും സാധാരണയായി അമ്മയോട് സംസാരിച്ചേക്കാം. എന്നാൽ, നിങ്ങൾ ഈ വിവരങ്ങളെല്ലാം സുഹൃത്തുക്കളോട് പങ്കുവെച്ചാൽ, അവർ ആ സംഭവത്തിന്‍റെ നെഗറ്റീവായ വശം മാത്രമായിരിക്കും ഓർത്തു വെക്കുക.
നിങ്ങളുടെ ഭാവിയെക്കുറിച്ചുള്ള സംഭാഷണങ്ങൾ
വിവാഹം, കുട്ടികൾ, സാമ്പത്തികം, മറ്റൊരു നഗരത്തിലേക്ക് മാറുന്നത്, ഒരുമിച്ച് ജീവിക്കുന്നത്, അല്ലെങ്കിൽ കരിയർ മാറ്റുന്നത്—ഇവയെല്ലാം ജീവിതത്തിലെ വലിയ കാര്യങ്ങളാണ്. എന്നാൽ ദമ്പതികൾ ആദ്യമായി ഇത്തരം കാര്യങ്ങൾ ചർച്ച ചെയ്യുമ്പോൾ, അവർക്കതിന് വ്യക്തമായ ഉത്തരങ്ങൾ ഉണ്ടായിക്കൊള്ളണമെന്നില്ല. ഇത് ഉടൻ തന്നെ കൂട്ടുകാരുമായി പങ്കുവയ്ക്കേണ്ടതില്ല.