മെസ്സിയുടെ അസിസ്റ്റിൽ ഇരട്ട ഗോളുകളുമായി എംബാപ്പെ; പി.എസ്.ജിക്ക് ഉജ്ജ്വല ജയം

മെസ്സി-എംബാപ്പെ കൂട്ടുകെട്ടിൽ പിറന്ന ഗോളുകളുടെ ബലത്തിൽ ചിരവൈരികളായ മാഴ്‌സെയെ 3-0ന് പരാജയപ്പെടുത്തി പി.എസ്.ജി. 25-ാം മിനിറ്റിൽ എംബാപ്പെയാണ് ഗോൾവേട്ടക്ക് തുടക്കമിട്ടത്. മെസ്സിയുടെ അസിസ്റ്റിൽനിന്നായിരുന്നു ഈ ഗോൾ പിറന്നത്. 29-ാം മിനിറ്റിൽ എംബാപ്പെയുടെ അസിസ്റ്റിൽ മെസ്സി നേടിയ ഗോളിലൂടെ പി.എസ്.ജി ലീഡ് ഇരട്ടിയാക്കി. ക്ലബ് കരിയറിൽ മെസിയുടെ 700-ാം ഗോളാണ് ഇത്.

രണ്ടാം പകുതിയിലും പി.എസ്.ജിക്ക് തന്നെയായിരുന്നു മേധാവിത്തം. 55-ാം മിനിറ്റിൽ വീണ്ടും മെസ്സി-എംബാപ്പെ കൂട്ടുകെട്ടിൽ പി.എസ്.ജി മാഴ്‌സെയുടെ വല കുലുക്കി. പി.എസ്.ജി കരിയറിൽ എംബാപ്പെയുടെ 200-ാം ഗോളായിരുന്നു ഇത്. ഇതോടെ എംബാപ്പെ കവാനിയുടെ റെക്കോർഡിന് ഒപ്പമെത്തി.

ജയത്തോടെ 25 മത്സരങ്ങളിൽനിന്ന് 60 പോയിന്റുമായി പി.എസ്.ജി ഇപ്പോൾ പോയിന്റ് പട്ടികയിൽ ഒന്നാം സ്ഥാനത്താണ്. മറുവശത്ത് 52 പോയിന്റുമായി മാഴ്‌സെ രണ്ടാം സ്ഥാനത്ത് തുടരുന്നു. 50 പോയിന്റുമായി മൊണാക്കോ ആണ് മൂന്നാമതുള്ളത്.