യുവന്റസ്: പ്രശസ്ത ഇറ്റാലിയൻ ഫുട്ബോൾ ക്ലബ്ബായ യുവന്റസിന്റെ ഔദ്യോഗിക ഇൻസ്റ്റഗ്രാം പേജിൽ ഇടംപിടിച്ച് മലയാളി ആർട്ടിസ്റ്റ് കരീം ഗ്രാഫി. യുവന്റസിന്റെ ഫ്രഞ്ച് മുന്നേറ്റനിര താരം റാണ്ടൽ കോലോ മുവാനിയുടെ ചിത്രം കാപ്പിക്കുരുകൾ ഉപയോഗിച്ച് നിർമ്മിച്ചാണ് കരീം ഗ്രാഫി ശ്രദ്ധേയനാകുന്നത്.
യുവന്റസ് തങ്ങളുടെ ഇൻസ്റ്റഗ്രാം അക്കൗണ്ടിലൂടെ ചിത്രം പങ്കുവെച്ചതോടെയാണ് ഈ അപൂർവ്വ കലാസൃഷ്ടി ലോകമെമ്പാടുമുള്ള ഫുട്ബോൾ പ്രേമികളിലേക്ക് എത്തിയത്. തികച്ചും വ്യത്യസ്തവും സൂക്ഷ്മവുമായ രീതിയിൽ കാപ്പിക്കുരുകൾ അടുക്കിവെച്ച് തയാറാക്കിയ ചിത്രം നിമിഷങ്ങൾക്കകമാണ് സോഷ്യൽ മീഡിയയിൽ വൈറലായത്. കഴിഞ്ഞ ദിവസം പങ്കുവെച്ച റീല് പത്ത് ലക്ഷത്തിലധികം പേരാണ് കണ്ടത്.
ഒരു മലയാളി ആർട്ടിസ്റ്റിന്റെ ക്രിയേറ്റിവിറ്റിയെ ലോകോത്തര ഫുട്ബോൾ ക്ലബ്ബ് ഔദ്യോഗികമായി അംഗീകരിച്ചതിന്റെ സന്തോഷത്തിലാണ് ആരാധകർ. ഇന്സ്റ്റഗ്രാമില് നിരവധിയാളുകളാണ് കരീം ഗ്രാഫിക്ക് ആശംസകളുമായി എത്തുന്നത്.
തനതായ ശൈലിയിലൂടെയും വ്യത്യസ്ത മാധ്യമങ്ങൾ ഉപയോഗിച്ചുള്ള ചിത്രരചനയിലൂടെയും മുമ്പും ശ്രദ്ധ നേടിയിട്ടുള്ള വ്യക്തിയാണ് കരീം ഗ്രാഫി. മുൻനിര ഫുട്ബോൾ ക്ലബ്ബിന്റെ ഔദ്യോഗിക പേജിൽത്തന്നെ ചിത്രം പ്രത്യക്ഷപ്പെട്ടത് അദ്ദേഹത്തിന്റെ കലാജീവിതത്തിലെ വലിയൊരു നേട്ടവുമായി. മലപ്പുറം ജില്ലയിലെ കക്കോവ് സ്വദേശിയായ അദ്ദേഹം ഖത്തറിലെ ദോഹ കേന്ദ്രമാക്കിയാണ് പ്രവർത്തിക്കുന്നത്.
Watch Video