എതിർ ടീമിലെ താരത്തെ അടിച്ചു വീഴ്ത്തി;മുഖത്ത് 24 സ്റ്റിച്ചുകൾ - വീഡിയോ

ഫുട്ബോൾ മത്സരത്തിന്റെ ആവേശത്തിനിടെ പല താരങ്ങളും തമ്മിൽ വാഗ്വാദങ്ങളും ചിലപ്പോഴെല്ലാം കൈയാങ്കളിയും മൈതാനത്ത് അരങ്ങേറാറുണ്ട്.ഇപ്പോൾ ഫുട്ബോൾ ലോകത്ത് ചർച്ചയാകുന്നത് എതിർ താരത്തെ അതിക്രൂരമായി ഇടിച്ചു വീഴ്ത്തുന്ന താരത്തിന്റെ വീഡിയോയാണ്.തായ്ലൻഡിലാണ് ഞെട്ടിക്കുന്ന സംഭവങ്ങൾ അരങ്ങേറിയത്.

ബാങ്കോക്ക് എഫ്സിയും നോർത്ത് ബാങ്കോക്ക് യൂനിവേഴ്സിറ്റി എഫ്സിയും തമ്മിലുള്ള മൂന്നാം ഡിവിഷൻ ലീഗ് പോരാട്ടത്തിനിടെയാണ് എതിർ താരത്തിന്റെ ഇടിയേറ്റ് മറ്റൊരു താരം ഗ്രൗണ്ടിൽ വീണത്. ബാങ്കോക്ക് എഫ്സിയുടെ ഐത്സാരെത് നയ്ചൈബൂൺ എന്ന താരമാണ് ഇവിടെ വില്ലനായത്. യൂനിവേഴ്സിറ്റി താരമായ സുപാസൻ റുവാങ്സുഫനിമിറ്റാണ് നയ്ചൈബൂണിന്റെ ഇടിയേറ്റ് ഗ്രൗണ്ടിൽ വീണത്. മുവായ് തായ് സ്റ്റൈലിൽ കൈമുട്ടു കൊണ്ടാണ് റുവാങ്സുഫനിമിറ്റിനെ നയ്ചൈബൂൺ ഇടിച്ചു വീഴ്ത്തിയത്.

പന്തുമായി നയ്ചൈബൂൺ മുന്നേറുന്നതിനിടെ റുവാങ്സുഫനിമിറ്റ് ബോൾ ലൈനിന് പുറത്തേക്ക് അടിച്ചു കളയുന്നു. പിന്നാലെ നയ്ചൈബൂണിനെ ഫൗൾ ചെയ്യാനും താരം ശ്രമിച്ചു. ഇത് നയ്ചൈബൂണിന് ഇഷ്ടമായില്ല. പന്തെടുത്ത് ത്രോ എറിയുന്നതിന് പകരം നയ്ചൈബൂൺ റുവാങ്സുഫനിമിറ്റിന് പിന്നാലെ എത്തി മുവായ് തായ് സ്റ്റലിൽ മുഖത്ത് ശക്തമായി ഇടിക്കുകയായിരുന്നു.

സംഭവത്തിന് പിന്നാലെ റഫറി നയ്ചൈബൂണിനെ ചുവപ്പ് കാർഡ് ഉയർത്തി ഗ്രൗണ്ടിന് പുറത്താക്കി. പിന്നാലെ താരത്തെ ക്ലബും പുറത്താക്കിയതായി വ്യക്തമാക്കി.ഇടിയേറ്റ താരത്തിന് മുഖത്ത് 24 സ്റ്റിച്ചുകളാണ് താരത്തിന് ഇടേണ്ടി വന്നത്.