ന്യൂഡല്‍ഹി: വാട്‌സ്ആപ്പ് അക്കൗണ്ടില്ലാത്തവർക്കും ഇനി വോയ്‌സ്, വീഡിയോ കോളുകളിൽ പങ്കെടുക്കാൻ അവസരമൊരുക്കി വാട്‌സ്ആപ്പ്. 'ഗസ്റ്റ് കോളിങ്' എന്ന പേരിലാണ് ഇൻസ്റ്റന്റ് മെസേജിങ് ആപ്പായ വാട്‌സ്ആപ്പ് പുതിയ സവിശേഷത അവതരിപ്പിച്ചിരിക്കുന്നത്.
അപ്ലിക്കേഷൻ ഡൗൺലോഡ് ചെയ്യാതെയോ അക്കൗണ്ട് തുടങ്ങാതെയോ തന്നെ ലിങ്ക് വഴി ആർക്കും കോളുകളിൽ പങ്കാളികളാകാം. തീർത്തും സൗജന്യമായി ലഭ്യമാകുന്ന ഈ ഗസ്റ്റ് കോളുകൾക്കും എൻഡ്-ടു-എൻഡ് എൻക്രിപ്ഷൻ സുരക്ഷ ഉണ്ടായിരിക്കും. സമയം പരിധിയില്ലാതെ സംസാരിക്കാം എന്നതും ഇതിന്റെ പ്രത്യേകതയാണ്. സഹപ്രവർത്തകർ, അധ്യാപകർ, വിദ്യാർഥികൾ തുടങ്ങി വാട്‌സ്ആപ്പ് ഉപയോഗിക്കാത്തവരുമായി വേഗത്തിൽ ആശയവിനിമയം നടത്താൻ ഈ ഫീച്ചർ സഹായിക്കും.
'ഗസ്റ്റ് കോളിങ്' എങ്ങനെ ഉപയോഗിക്കാം?
വാട്‌സ്ആപ്പ് അക്കൗണ്ട് ഉള്ളയാൾക്ക് മാത്രമേ കോൾ ലിങ്ക് അയക്കാന്‍ സാധിക്കൂ. ലിങ്ക് വഴി വരുന്നവരെ 'വെയ്റ്റിംഗ് റൂമിൽ' നിർത്തുകയും, അനുമതി നൽകിയാൽ മാത്രം കോളിലേക്ക് പ്രവേശിപ്പിക്കുകയും ചെയ്യും. എകദേശം 32 പേർക്ക് വരെ ഒരേസമയം ഗ്രൂപ്പ് കോളിൽ പങ്കെടുക്കാം. സുരക്ഷ മുൻനിർത്തി ചില നിയന്ത്രണങ്ങളും ഏർപ്പെടുത്തിയിട്ടുണ്ട്. കോളിലുള്ള മറ്റുള്ളവരുടെ ഫോൺ നമ്പറുകൾ കാണാനോ, സന്ദേശങ്ങൾ അയക്കാനോ, നേരിട്ട് മറ്റു ആളുകളെ കോളിലേക്ക് ചേർക്കാനോ 'ഗസ്റ്റുകൾക്ക്' സാധിക്കില്ല.