രാജസ്ഥാനിൽ നടന്ന ഒരു പൊതുപരിപാടിക്കിടെ വിദ്യാഭ്യാസ മന്ത്രി മദൻ ദിലാവറും ഒരു യുവതിയും തമ്മിലുള്ള വാദപ്രതിവാദങ്ങളുടെ വീഡിയോ സോഷ്യൽ മീഡിയയിൽ വലിയ ചർച്ചയ്ക്ക് വഴിവച്ചിരിക്കുകയാണ്. ഒരു എക്സ് ഉപയോക്താവ് പങ്കിട്ട വീഡിയോയിൽ, യുവതിയും മന്ത്രിയും തമ്മിൽ ഭാഷയുടെ പേരിൽ വലിയ തർക്കം നടത്തുന്നത് കാണാം.
സംസ്ഥാനത്തെ വിദ്യാഭ്യാസ മേഖലയിലെ മോശം അവസ്ഥയെക്കുറിച്ച് ആശങ്കകൾ ഉന്നയിക്കുകയായിരുന്ന യുവതി ഇംഗ്ലീഷിൽ സ്വയം പരിചയപ്പെടുത്താൻ തുടങ്ങുന്നു. എന്നാൽ ആമുഖത്തിന് തൊട്ടുപിന്നാലെ, മന്ത്രി അവളെ തടസപ്പെടുത്തുകയായിരുന്നു. യുവതിയോട് ഹിന്ദിയിൽ സംസാരിക്കാൻ ആവശ്യപ്പെടുന്നു. തുടർന്ന് നടന്ന ചർച്ചയാണ് ഇപ്പോൾ വൈറലായിരിക്കുന്നത്.
"സർ, അപ് തോ ശിക്ഷ മന്ത്രി ഹെയ്ൻ (സർ, നിങ്ങളാണ് വിദ്യാഭ്യാസ മന്ത്രി)" എന്ന് യുവതി മന്ത്രിയോട് പെട്ടെന്ന് മറുപടി പറഞ്ഞു. കരുത്തുറ്റതും എന്നാൽ ശാന്തവുമായ മറുപടി ചുറ്റും നിന്നവരിൽ ചിരി പടർത്തുകയും ചെയ്തു. എന്നാൽ, ഹിന്ദിയിൽ സംസാരിക്കണമെന്ന് മന്ത്രി നിർബന്ധം പിടിച്ചപ്പോൾ, യുവതി തന്റെ നിലപാട് കൂടുതൽ വ്യക്തമാക്കി. "സർ, ജിത്ന ആജ് കെ സമയ് മേ ഹിന്ദി കി വാല്യു ഹേ, ഉത്നി ഹേ ഇംഗ്ലീഷ് കി ഭി വാല്യു ഹേ." (സർ, ഇന്നത്തെ കാലത്ത് ഹിന്ദിക്കും, ഇംഗ്ലീഷിനും ഒരു മൂല്യമുണ്ട്.) എന്നായിരുന്നു മറുപടി.
ഒടുവിൽ, ഭാഷ മാറ്റാൻ അവർ സമ്മതിച്ചു, "ശരി സർ, കുഴപ്പമില്ല" എന്ന് പറഞ്ഞുകൊണ്ട് ഹിന്ദിയിൽ സംഭാഷണം തുടർന്നു. വീഡിയോ പങ്കിട്ട ഉപയോക്താവ് അതിന് അടിക്കുറിപ്പ് നൽകിയത്, "ചേച്ചി പിന്മാറിയില്ല. ഒരു വിദ്യാഭ്യാസ മന്ത്രിക്ക് യഥാർത്ഥത്തിൽ വിദ്യാഭ്യാസം ലഭിക്കണമെന്ന് എല്ലാവരെയും കാണിച്ചു. ചേച്ചിയെപ്പോലെയാകൂ." എന്നായിരുന്നു.
നിരവധിപേരാണ് വീഡിയോയ്ക്ക് താഴെ കമൻ്റുമായെത്തിയത്. ഒരു ഉപയോക്താവ് അഭിപ്രായപ്പെട്ടു, “ മന്ത്രിയെ പരസ്യമായി വറുക്കുന്നത് വേറെ ലെവൽ സന്തോഷം നൽകുന്നു.” മറ്റൊരാൾ എഴുതി, “മന്ത്രി ഉടൻ തന്നെ ബ്യൂറോക്രാറ്റുകളോട് അത് വിവർത്തനം ചെയ്യാൻ ആവശ്യപ്പെടണം.” മറ്റൊരാൾ കൂട്ടിച്ചേർത്തു, “ജെൻസികൾ, സിസ്റ്റത്തിൽ മാറ്റം കൊണ്ടുവരുമെന്ന് ഞാൻ പ്രതീക്ഷിക്കുന്നു, കാരണം അവർ സമൂഹത്തിന് ഒരു കണ്ണാടിയാകുന്നു. വിദ്യാഭ്യാസം എത്ര പ്രധാനമാണെന്ന് അവർ തെളിയിക്കുന്നു, പ്രത്യേകിച്ച് ശരിയായ ആളുകൾക്ക് അധികാരം നൽകുന്ന കാര്യത്തിൽ.” പെട്ടന്നുള്ള പ്രതികരണത്തിൽ മന്ത്രി ഞെട്ടിയതായും അങ്ങനെയൊരു പ്രതികരണം അദ്ദേഹം പ്രതീക്ഷിച്ചിരുന്നില്ലെന്നും ചിലർ പ്രതികരിച്ചു.