Writer - അഞ്ജലി ശ്രീജിതാരാജ്
വെബ് ജേണലിസ്റ്റ്, മീഡിയവൺ
'ലോകത്തിലെ ഏറ്റവും നല്ല ന്യായാധിപന്'; ഫ്രാങ്ക് കാപ്രിയോ അന്തരിച്ചു
സൗമ്യനായ ജഡ്ജ് എന്ന നിലയില് പ്രശസ്തനായ വ്യക്തിയാണ് ഫ്രാങ്ക് കാപ്രിയോ
Update: 2025-08-21 04:49 GMT
വാഷിങ്ടണ്: തന്റെ മുന്പിലെത്തുന്ന ഓരോ വ്യക്തിയെയും സഹാനുഭൂതിയോടെ മനസ്സിലാക്കി സൗമ്യമായി വിധി പ്രസ്താവിച്ചിരുന്ന പ്രശസ്ത ജഡ്ജി ഫ്രാങ്ക് കാപ്രിയോ അന്തരിച്ചു. 88 വയസ്സായിരുന്നു. അര്ബുദ ബാധയെ തുടര്ന്ന് ചികിത്സയിലായിരുന്നു ഫ്രാങ്ക് കാപ്രിയോ. അമേരിക്കയിലെ മുന്സിപ്പല് കോര്ട്ട് ഓഫ് പ്രൊവിഡന്സിലെ മുന് ജഡ്ജിയാണ്. അദ്ദേഹത്തിന്റെ 'കോട്ട് ഇന് പ്രൊവിഡന്സ്' എന്ന ഷോ സമൂഹ മാധ്യമങ്ങളില് ഏറെക്കാലം വൈറലായിരുന്നു.
അമേരിക്കയിലെ മുന്സിപ്പല് കോര്ട്ട് ഓഫ് പ്രൊവിഡന്സിലെ മുന് ചീഫ് ജഡ്ജിയായിരുന്ന ഫ്രാങ്കിന്റെ കോടതി വീഡിയോകള് സമൂഹ മാധ്യമങ്ങളില് വൈറലാണ്. ജഡ്ജി എന്ന നിലയിലെ ഇടപെടലിന് നിരവധി അവാര്ഡുകളും അദ്ദേഹത്തെ തേടിയെത്തിയിട്ടുണ്ട്. ലോകത്തിലെ തന്നെ ഏറ്റവും സൗമ്യനായ ജഡ്ജ് എന്ന നിലയില് പ്രശസ്തനായ വ്യക്തിയാണ് ഫ്രാങ്ക് കാപ്രിയോ.
പിഴ ഒടുക്കാന് പണമില്ലാതെ വരുന്ന പ്രതികളുടെ യഥാര്ത്ഥ അവസ്ഥ എന്താണെന്ന് ലോകത്തിന് മനസ്സിലാക്കിക്കൊടുക്കാന് ജഡ്ജ് ഫ്രാങ്ക് ശ്രമിക്കുന്ന വീഡിയോകള് സഹജീവികളോടുള്ള സഹാനുഭൂതിയുടെ മികച്ച ഉദാഹരണങ്ങളാണ്. സിറ്റി ഓഫ് പ്രൊവിഡന്സില് ഹൈസ്കൂള് അധ്യാപകനായാണ് ഫ്രാങ്ക് ഔദ്യോഗിക ജീവിതം ആരംഭിച്ചത്. സായാഹ്ന ക്ലാസുകളിലൂടെയാണ് അദ്ദേഹം നിയമ ബിരുദം സ്വന്തമാക്കിയത്.