തെഹ്റാൻ: ഇറാന്റെ മുൻ പരമോന്നത നേതാവ് ആയത്തുല്ല അലി ഖാംനഈയുടെ കൊലപാതകത്തിന് പകരം ചോദിക്കുമെന്ന് മകനും രാജ്യത്തിന്റെ പുതിയ പരമോന്നത നേതാവുമായ ആയത്തുല്ല മുജ്തബ ഖാംനഈ. പിതാവിന്റെ സംസ്കാരച്ചടങ്ങുകൾക്ക് ശേഷം പുറത്തിറക്കിയ ഔദ്യോഗിക സന്ദേശത്തിലാണ് ഈ പ്രഖ്യാപനം. പിതാവിന്റെ 'നിഷ്കളങ്കമായ രക്തത്തിന്' പകരം ചോദിക്കുക എന്നത് ഇറാൻ ജനതയുടെ ദൃഢനിശ്ചയമാണെന്നും അത് തീർച്ചയായും നടപ്പാക്കുമെന്നും അദ്ദേഹം വ്യക്തമാക്കി.
കഴിഞ്ഞ ഫെബ്രുവരി അവസാനത്തോടെ ആരംഭിച്ച യുഎസ്-ഇസ്രായേൽ സംയുക്താക്രമണത്തിന്റെ ആദ്യ ദിനത്തിലാണ് അലി ഖാംനഈ കൊല്ലപ്പെട്ടത്. ഇതിന് പിന്നാലെയാണ് ഇറാന്റെ പരമോന്നത നേതാവായി മുജ്തബ ഖാംനഈ ചുമതലയേറ്റത്. ശത്രുക്കൾക്ക് മുന്നിൽ ഇറാൻ ഒരിക്കലും മുട്ടുമടക്കില്ലെന്നും, രാജ്യത്തിന്റെ പരമാധികാരത്തിനും നേതൃത്വത്തിനും നേരെയുണ്ടായ ഈ കടന്നാക്രമണത്തിന് ഉചിതമായ മറുപടി നൽകുമെന്നും തന്റെ സന്ദേശത്തിൽ അദ്ദേഹം ഓർമിപ്പിച്ചു. പ്രതികാരം എന്നത് കേവലം ഒരു വൈകാരിക പ്രതികരണമല്ലെന്നും, അത് രാജ്യത്തിന്റെ കൂട്ടായ ഇച്ഛാശക്തിയും ജനങ്ങളുടെ ആവശ്യവുമാണെന്നും അദ്ദേഹം കൂട്ടിച്ചേർത്തു.
അതേസമയം, അലി ഖാംനഈയുടെ സംസ്കാരച്ചടങ്ങിൽ പങ്കെടുത്ത ലക്ഷക്കണക്കിന് ജനങ്ങൾക്ക് മുജ്തബ ഖാംനഈ നന്ദി രേഖപ്പെടുത്തി. ശത്രുക്കളുടെ മനോവീര്യം തകർക്കുന്ന തരത്തിലുള്ള ജനങ്ങളുടെ ചരിത്രപരമായ സാന്നിധ്യം രാജ്യത്തിന്റെ അചഞ്ചലമായ ഐക്യത്തിന്റെ തെളിവാണെന്ന് അദ്ദേഹം ചൂണ്ടിക്കാട്ടി. യുദ്ധത്തിന്റെ പശ്ചാത്തലത്തിലും തെരുവുകളിൽ തടിച്ചുകൂടിയ ജനസാഗരം ഇറാന്റെ പ്രതിരോധത്തിന്റെ പ്രതീകമാണ്. പ്രതിസന്ധി ഘട്ടത്തിൽ ജനങ്ങൾ നൽകുന്ന ഈ വലിയ പിന്തുണയാണ് ഇറാന്റെ ഏറ്റവും വലിയ ശക്തിയെന്നും, ഈ ഐക്യം ശത്രുക്കളുടെ ഏത് ഗൂഢാലോചനയെയും പരാജയപ്പെടുത്തുമെന്നും അദ്ദേഹം പ്രസ്താവിച്ചു.