ട്രംപിന്റെ 25 ശതമാനം തീരുവ ഇന്ന്​ മുതൽ പ്രാബല്യത്തിൽ; തിരിച്ചടിക്കുമെന്ന്​​ കാനഡ

വാഷിങ്​ടൺ: അയൽ രാജ്യങ്ങൾക്ക്​ ഉയർന്ന ഇറക്കുമതി തീരുവ ചുമത്തുന്നതിൽനിന്ന്​ പിന്മാറൻ അമേരിക്കൻ പ്രസിഡൻറ്​ ഡോണൾഡ്​ ട്രംപ്​ വിസമ്മതിച്ചതോടെ യുഎസ്​ ഉൽപ്പന്നങ്ങൾക്കും ‘പ്രതികാര’ തീരുവ ചുമത്തുമെന്ന്​ കാനഡ. ട്രംപ് ഭരണകൂടം പദ്ധതിയുമായി മുന്നോട്ടുപോയാൽ ചൊവ്വാഴ്ച മുതൽ 30 ബില്യൺ കനേഡിയൻ ഡോളർ വിലമതിക്കുന്ന യുഎസ് ഉൽപ്പന്നങ്ങൾക്ക് 25 ശതമാനം തീരുവ ചുമത്തുമെന്ന് കനേഡിയൻ പ്രസിഡൻറ്​ ജസ്​റ്റിൻ ട്രൂഡോ പറഞ്ഞു. 125 ബില്യൺ കനേഡിയൻ ഡോളറി​െൻറ യുഎസ് ഉൽപ്പന്നങ്ങൾക്ക് 21 ദിവസത്തിനുള്ളിൽ അധിക തീരുവ ഈടാക്കുമെന്നും ട്രൂഡോ പറഞ്ഞു.

‘യുഎസ് വ്യാപാര നടപടി പിൻവലിക്കുന്നതുവരെ ഞങ്ങളുടെ താരിഫുകൾ നിലനിൽക്കും. യുഎസ് താരിഫുകൾ അവസാനിപ്പിച്ചില്ലെങ്കിൽ, നിരവധി താരിഫ് ഇതര നടപടികൾ സ്വീകരിക്കാനായി പ്രവിശ്യകളുമായും പ്രദേശങ്ങളുമായും സജീവ ചർച്ചകൾ നടത്തിവരികയാണ്’ -ട്രൂഡോ വ്യക്​തമാക്കി.

25 ശതമാനം തീരുവ ചുമത്തിയാൽ രാജ്യം അതിനെ നേരിടാൻ തയ്യാറാണെന്ന് മെക്സിക്കോ പ്രസിഡന്റ് ക്ലോഡിയ ഷെയിൻബോം പറഞ്ഞു. അതേസമയം, ഇതി​െൻറ കൂടുതൽ വിശദാംശങ്ങൾ നൽകാൻ അദ്ദേഹം തയ്യാറായില്ല. അമേരിക്കക്കെതിരെ ചൈനയും രംഗത്തുവന്നിട്ടുണ്ട്​. യുഎസ് താരിഫ്​ ചുമത്തുന്ന പദ്ധതികളുമായി മുന്നോട്ടുപോയാൽ തങ്ങളും പ്രതികാരം ചെയ്യുമെന്ന് വാണിജ്യ മന്ത്രാലയം വ്യക്​തമാക്കി.

ചൊവ്വാഴ്ച മുതൽ 25 ശതമാനം തീരുവ പ്രാബല്യത്തിൽ വരുന്നത് തടയാൻ മെക്സിക്കോയ്‌ക്കും കാനഡയ്‌ക്കും കഴിയില്ലെന്ന്​ ട്രംപ് തിങ്കളാഴ്ച വ്യക്​തമാക്കുകയുണ്ടായി. ‘അവർക്ക് ഒരു താരിഫ് ഏർപ്പെടുത്തേണ്ടിവരും. അതുകൊണ്ട് അവർ ചെയ്യേണ്ടത്, തുറന്നു പറയട്ടെ, അമേരിക്കയിൽ അവരുടെ കാർ പ്ലാന്റുകൾ നിർമിക്കുക എന്നതാണ്. അങ്ങനെയെങ്കിൽ അവർക്ക് താരിഫുകളില്ല’ -ട്രംപ് വൈറ്റ് ഹൗസിൽ പറഞ്ഞു. അമേരിക്കൻ ഉൽപ്പന്നങ്ങൾക്ക് തീരുവ ചുമത്തുന്ന രാജ്യങ്ങൾക്ക് ഏപ്രിൽ രണ്ട്​ മുതൽ പരസ്പര താരിഫ് പ്രാബല്യത്തിൽ വരുമെന്നും ട്രംപ് പറഞ്ഞു. അതേസമയം, ട്രംപിന്റെ പ്രസ്താവനയ്ക്ക് ശേഷം യുഎസ് ഓഹരി സൂചികകളിൽ ഇടിവ്​ രേഖപ്പെടുത്തി.