ഏറ്റവും രുചികരവും മധുരമുള്ളതുമായ പഴങ്ങളിലൊന്നാണ് മൾബറി. ചൈനയാണ് സ്വദേശമെങ്കിലും പട്ടുനൂൽ പുഴുവിൻറെ പ്രധാന ആഹാരം മൾബറിച്ചെടിയുടെ ഇലയാകയാൽ ഇന്ത്യയിലൂടനീളം ഇത് കൃഷിചെയ്യുന്നുണ്ട്. മൈസൂരുവിലാണ് ഏറ്റവും കൂടുതൽ മൾബറി കൃഷി ചെയ്യുന്നത്. ഏറെ ഔഷധ ഗുണമുള്ളതാണ് ഇതിന്‍റെ പഴങ്ങൾ. കിലോഗ്രാമിന് 100 രൂപ മുതലാണ് ഇതിന്‍റെ വില. കടകളിൽ നിന്നും വാങ്ങാതെ തന്നെ നിങ്ങളുടെ വീട്ടുമുറ്റത്ത് മൾബറി നട്ടുപിടിപ്പിക്കാവുന്നതാണ്. കുറഞ്ഞ ചെലവും കുറഞ്ഞ പരിപാലനവും മാത്രം മതി.
തണ്ട് വെട്ടിയെടുത്തോ പഴത്തിനുള്ളിലെ വിത്തുകളിൽ നിന്നോ നിങ്ങൾക്ക് മൾബറി വളർത്താം. വേഗം ഫലം ലഭിക്കാൻ തണ്ട് നടുന്നതാണ് ഉത്തമം. ഇതിനായി വേനൽക്കാലത്ത് ഭാഗികമായി മൂപ്പുള്ള തണ്ടുകളും ശരത്കാലത്ത് മൂപ്പ് കൂടിയ തണ്ടുകളും തെരഞ്ഞെടുക്കുക. ഏകദേശം 8 മുതൽ 12 ഇഞ്ച് വരെ നീളമുള്ള ആരോഗ്യമുള്ള ഒരു കൊമ്പ് തെരഞ്ഞെടുത്ത് ചരിച്ച രീതിയിൽ വൃത്തിയായി മുറിച്ചെടുക്കുക. തണ്ടിന്റെ താഴത്തെ ഭാഗത്തെ ഇലകൾ നീക്കം ചെയ്യുകയും മുകൾഭാഗത്ത് കുറഞ്ഞത് രണ്ടോ മൂന്നോ ഇലകൾ മാത്രം നിർത്തുകയും ചെയ്യുക. വിത്ത് ഉപയോഗിച്ചാണ് നിങ്ങൾ മൾബറി നടാൻ ആഗ്രഹിക്കുന്നതെങ്കിൽ നന്നായി പഴുത്ത പഴത്തിൽ നിന്ന് വിത്തുകൾ വേർതിരിച്ചെടുത്ത് അതിന് ചുറ്റുമുള്ള പഴച്ചാറും കാമ്പും കഴുകി മാറ്റുക.
നനഞ്ഞതും നല്ല നീർവാർച്ചയുള്ളതുമായ മിശ്രിതമുള്ള ചട്ടിയിൽ തണ്ട് നടുക. വേരൂന്നതുവരെ കനത്ത വെയിലടിക്കുന്നത് നല്ലതല്ല. കാരണം സൂര്യപ്രകാശം വളര്‍ച്ചയെ നശിപ്പിക്കുകയും തണ്ടുകൾ കരിഞ്ഞുപോകാൻ ഇടയാക്കുകയും ചെയ്യും. വിത്തുകൾ ഉപയോഗിച്ച് വളർത്തുന്നതിന് കൂടുതൽ ക്ഷമ ആവശ്യമാണ്. വിത്തുകൾ എളുപ്പത്തിൽ മുളച്ചു വരുന്നതിനായി 4 മുതൽ 16 ആഴ്ച വരെ അവ ഫ്രിഡ്ജിൽ വെച്ച് തണുപ്പിക്കുക. അതിനുശേഷം, സീഡ്-സ്റ്റാർട്ടിങ് മിക്സിൽ വിത്തുകൾ പാകി നേരിയ രീതിയിൽ ഈർപ്പം നിലനിർത്തുക. മുളകൾ വരുന്നത് വരെ ട്രേ നേരിയ രീതിയിൽ മൂടിവെക്കുക. തണ്ടുകൾ മുറിച്ചു നടുമ്പോൾ ചിലത് വേരുപിടിക്കാതെ നശിച്ചുപോകാൻ സാധ്യതയുള്ളതിനാൽ, വിജയസാധ്യത കൂട്ടാൻ ഒന്നിലധികം തണ്ടുകൾ നടുന്നത് നന്നായിരിക്കും.
തണ്ടുകളിൽ വേരുകൾ വരികയോ അല്ലെങ്കിൽ വിത്തുകൾ മുളച്ച് ചെറിയ തൈകൾ ആകുകയോ ചെയ്താൽ അവ മാറ്റേണ്ട സമയമായി. ചട്ടിയിലാണ് നടുന്നതെങ്കിൽ, ചുരുങ്ങിയത് 50 മുതൽ 60 സെന്റീമീറ്റർ വരെ വീതിയും ആഴവുമുള്ള, അടിയിൽ വെള്ളം വാർന്നുപോകാൻ സുഷിരങ്ങളുള്ള വലിയ പാത്രം തിരഞ്ഞെടുക്കുക. പോട്ടിംഗ് മിക്സ്, തോട്ടത്തിലെ മണ്ണ്, ജൈവവളം എന്നിവ ചേർത്ത മിശ്രിതം ചട്ടിയിൽ നിറയ്ക്കുക. തൈ ഉറപ്പിച്ചു നട്ടതിനുശേഷം ചുറ്റുമുള്ള മണ്ണ് പതുക്കെ അമർത്തി നന്നായി വെള്ളമൊഴിച്ചു കൊടുക്കുക.
മൾബറികൾക്ക് സൂര്യപ്രകാശം വളരെ ഇഷ്ടമാണ്, അതിനാൽ ആവശ്യത്തിന് സൂര്യപ്രകാശം ലഭിക്കുന്ന സ്ഥലത്ത്, ദിവസവും ആറ് മുതൽ എട്ട് മണിക്കൂർ വരെ ചട്ടി വയ്ക്കുക. ചെടി ചെറുതായിരിക്കുമ്പോൾ, മണ്ണ് സ്ഥിരമായി ഈർപ്പമുള്ളതായി നിലനിർത്തുക, പക്ഷേ നനവുള്ളതായിരിക്കരുത്. ഒരിക്കൽ വേരുപിടിച്ചാൽ, മൾബറി മരങ്ങൾ വളരെ എളുപ്പത്തിൽ വളരുന്നവയാണ്.
ചട്ടിയിൽ വളർത്തുന്ന മൾബറികൾക്ക് പതിവായി കമ്പോസ്റ്റ് ആവശ്യമാണ്. അതിനാൽ ഓരോ 15 ദിവസത്തിലും അവയ്ക്ക് ഭക്ഷണം നൽകുകയും രണ്ടോ മൂന്നോ മാസത്തിലൊരിക്കൽ കമ്പോസ്റ്റോ സ്ലോ-റിലീസ് വളമോ ചേർക്കുകയും ചെയ്യേണ്ടത് പ്രധാനമാണ്. പ്രൂണിംഗ് ചെടിയെ വൃത്തിയും ഉൽ‌പാദനക്ഷമതയും നിലനിർത്തുന്നു. ദുർബലമായ, ഉണങ്ങിയ അല്ലെങ്കിൽ പടർന്ന് പിടിച്ച ശാഖകൾ നീക്കം ചെയ്യുക. അതിനായി എപ്പോഴും വൃത്തിയുള്ളതും മൂർച്ചയുള്ളതുമായ ഉപകരണങ്ങൾ ഉപയോഗിക്കുക.