സ്വര്‍ണവില കുറഞ്ഞു; വായ്പാനയത്തില്‍ വീണ് വിപണികള്‍
ബുധനാഴ്ച സ്‌പോട്ട് ഗോള്‍ഡിന്റെ വില 0.3 ശതമാനം ഇടിഞ്ഞ് ഔണ്‍സിന് 4,150.23 ഡോളറായി
Update: 2026-10-07 05:51 GMT
കൊച്ചി: കേരളത്തിലെ സ്വര്‍ണവിലയില്‍ ഇടിവ്. ഗ്രാമിന് 60 രൂപയുടെ കുറവാണ് ഉണ്ടായത്. 13,710 രൂപയായാണ് വില കുറഞ്ഞത്. പവന്റെ വിലയില്‍ 480 രൂപയുടെ കുറവാണ് ഉണ്ടായത്. 1,09,680 രൂപയായാണ് വില കുറഞ്ഞത്.
ബുധനാഴ്ച സ്‌പോട്ട് ഗോള്‍ഡിന്റെ വില 0.3 ശതമാനം ഇടിഞ്ഞ് ഔണ്‍സിന് 4,150.23 ഡോളറായി. അമേരിക്കന്‍ ഗോള്‍ഡ് ഫ്യൂച്ചേഴ്‌സ് വിലയും 0.2 ശതമാനം കുറഞ്ഞ് 4,177.60 ഡോളറിലെത്തി. ഫെഡറല്‍ ഓപ്പണ്‍ മാര്‍ക്കറ്റ് കമ്മിറ്റി സെപ്റ്റംബര്‍ യോഗത്തിന്റെ മിനിറ്റ്‌സാണ് ഇനി സ്വര്‍ണവിപണിയുടെ പ്രധാന ശ്രദ്ധാകേന്ദ്രം. വരും മാസങ്ങളില്‍ പലിശനിരക്ക് വീണ്ടും ഉയര്‍ത്തുന്നതിന് ഫെഡറല്‍ റിസര്‍വിലെ എത്ര അംഗങ്ങള്‍ക്ക് പിന്തുണയുണ്ടെന്നതിനെക്കുറിച്ച് മിനിറ്റ്‌സ് കൂടുതല്‍ വ്യക്തമായ സൂചന നല്‍കുമെന്നാണ് വിപണി പ്രതീക്ഷിക്കുന്നത്.
പലിശനിരക്ക് സംബന്ധിച്ച തീരുമാനത്തിനൊപ്പം അമേരിക്കന്‍ ട്രഷറി ബോണ്ട് വരുമാനം, ഡോളറിന്റെ മൂല്യം, മിഡില്‍ ഈസ്റ്റിലെ സംഘര്‍ഷം എന്നിവയും സ്വര്‍ണവിലയുടെ അടുത്ത നീക്കത്തെ സ്വാധീനിച്ചേക്കാം എന്നാണ് വിപണി വിദഗ്ധരുടെ വിലയിരുത്തല്‍.
അമേരിക്കയിലെ പണപ്പെരുപ്പം നിയന്ത്രിക്കുന്നതില്‍ ഫെഡറല്‍ റിസര്‍വ് ഇപ്പോഴും ജാഗ്രത പുലര്‍ത്തുകയാണ്. കൂടുതല്‍ പലിശനിരക്ക് വര്‍ധന ആവശ്യമായി വരുമോ എന്നത് പണപ്പെരുപ്പം ഉയര്‍ത്തുന്ന ഘടകങ്ങള്‍ താല്‍ക്കാലികമാണോ അതോ തുടരുമോ എന്നതിനെ ആശ്രയിച്ചിരിക്കുമെന്ന് സാന്‍ ഫ്രാന്‍സിസ്‌കോ ഫെഡ് പ്രസിഡന്റ് മേരി ഡാലി വ്യക്തമാക്കിയിട്ടുണ്ട്.
അതേസമയം, ആര്‍ബിഐ പലിശനിരക്ക് ഉയര്‍ത്തുമെന്ന പ്രതീക്ഷ ഇന്ത്യന്‍ ഓഹരി വിപണികളില്‍ ഇടിവുണ്ടാക്കി. ബോംബെ സൂചിക സെന്‍സെക്‌സും ദേശീയ സൂചിക നിഫ്റ്റിയും നഷ്ടത്തിലാണ് വ്യാപാരം നടത്തുന്നത്. കഴിഞ്ഞ ദിവസം ഇരു സൂചികകളും നേട്ടമുണ്ടാക്കിയിരുന്നു.