ചെന്നൈ: സംഗീത സംവിധായകൻ ഇളയരാജക്ക് കേന്ദ്ര ചരക്ക് സേവന വകുപ്പിന്റെ നോട്ടീസ്.നികുതി അടയ്ക്കുന്നതിൽ വീഴ്ച വരുത്തിയതിനാണ് നോട്ടീസ് അയച്ചിരിക്കുന്നത്. 2013 മുതൽ 2015 കാലയളവിൽ സിനിമകളിൽ സംഗീതമൊരുക്കിയതിന്റെ പേരിൽ നിർമാതാക്കളിൽ നിന്നു കൈപ്പറ്റിയ പണത്തിന്റെ നികുതിയായ 1.87 കോടി രൂപയാണ് ഇളയരാജ സേവന നികുതിയായി അടയ്ക്കാനുള്ളത്. ഈ തുക അടച്ചില്ലെന്നും അതിന് കാരണം കാണിക്കണമെന്നും ആവശ്യപ്പെട്ടാണ് നോട്ടീസ് അയച്ചിരിക്കുന്നത്.
മൂന്നുതവണ മുന്നറിയിപ്പ് നൽകിയിട്ടും പ്രതികരിക്കാത്തതിനെ തുടർന്നാണ് ഇത്തവണ ജിഎസ്ടി ചെന്നൈ സോൺ ഇളയരാജയ്ക്ക് കാരണം കാണിക്കൽ നോട്ടീസ് അയച്ചത്. അടുത്തിടെ പ്രധാനമന്ത്രിയെയും അംബേദ്കറെയും താരതമ്യം നടത്തി ഇളയരാജ ഒരു പുസ്തകത്തിൽ എഴുതിയ ആമുഖം ഏറെ വിവാദം സൃഷ്ടിച്ചിരുന്നു. മോദിയെ പുകഴ്ത്തിയത് നികുതിവെട്ടിപ്പ് നടപടികളിൽനിന്നു രക്ഷപ്പെടാനാണെന്നും ആക്ഷേപവും ഉയർന്നിരുന്നു.