ആറു ലക്ഷത്തി മുപ്പതിനായിരം പേരിലേക്ക് റമദാന് സേവന പ്രവര്ത്തനങ്ങളെത്തിക്കാനാണ് ഖത്തര് ചാരിറ്റിയുടെ പദ്ധതി
റമദാനില് ഖത്തറിലെ ജീവകാരുണ്യ സേവന പ്രവര്ത്തനങ്ങള്ക്കായി ഒരു കോടി 60 ലക്ഷം റിയാല് മാറ്റി വെച്ചിരിക്കുകയാണ് ഖത്തര് ചാരിറ്റി. ആറു ലക്ഷത്തി മുപ്പതിനായിരം പേരിലേക്ക് റമദാന് സേവന പ്രവര്ത്തനങ്ങളെത്തിക്കാനാണ് ഖത്തര് ചാരിറ്റിയുടെ പദ്ധതി. നോമ്പു കാലത്ത് ഖത്തറിന്റെ വിവിധ ഭാഗങ്ങളില് ഉയര്ന്ന് നില്ക്കുന്ന ഇഫ്താര് കൂടാരങ്ങളിലധികവും ഖത്തര് ചാരിറ്റിയുടെ വകയാണ് . ഈ വര്ഷം 31 ടെന്റുകളാണ് ഖത്തറിലുടനീളമായി ഖത്തര് ചാരിറ്റിയുടെതായിട്ടുള്ളത്.
75 ലക്ഷം റിയാല് മുടക്കി ഈ കൂടാരങ്ങള് വഴി രണ്ട് ലക്ഷത്തി ഇരുപത്തയ്യായിരം പേരെ നോമ്പ് തുറപ്പിക്കാനാണ് ഖത്തര്ചാരിറ്റിയുടെ പദ്ധതി. ഇതിനു പുറമെ സാധാരണ തൊഴിലാളികള്ക്കും പ്രവാസി കുടുംബങ്ങള്ക്കുമിടയില് റമദാന് വിഭവങ്ങള് വിതരണം ചെയ്തും പെരുന്നാളിനോടനുബന്ധിച്ച് ഫിത്ര് സകാത്ത് നല്കിയും രാജ്യത്തിനകത്തെ ചാരിറ്റിയുടെ റമദാന് സേവനങ്ങള് 6,30,000 പേരിലേക്കെത്തും.