ഈ വേനൽക്കാലം കുവൈത്ത് എയർവേയ്സിനൊപ്പം; 11 സ്ഥലങ്ങളിലേക്ക് സർവീസ് പ്രഖ്യാപിച്ചു

കുവൈത്ത് സിറ്റി: സമ്മർ സീസണിലേക്ക് പുതിയ സർവീസുകൾ പ്രഖ്യാപിച്ച് കുവൈത്ത് എയർവേയ്സ്. സലാല, അലക്സാണ്ട്രിയ, സൂറിച്,മൈക്കോനോസ്, ഷാം അൽ ഷൈക്, മലാ​ഗ, വിയന്ന, സരജാവോ, ബോഡ്രം, ട്രാബ്സോൺ , അൻ്റാലിയ എന്നിങ്ങനെയുള്ള പുതിയ ഡെസ്റ്റിനേഷനിലേക്കാണ് സർവീസുകൾ പ്രഖ്യാപിച്ചിരിക്കുന്നത്. എല്ലാ ഇക്കോണമി ക്ലാസിലേക്കുമായി 15 % ഡിസ്കൗണ്ടും പ്രഖ്യാപിച്ചിട്ടുണ്ട്.

കുവൈത്ത് എയർവേയ്സിൻ്റെ നെറ്റ്‍വർക്ക് വിപുലീകരിക്കുന്നതിനും സമ്മർ സീസണിലെ ഉയർന്ന ഡിമാന്റ് പരി​ഗണിക്കുന്നതിനും ഇതിലൂടെ സാധിക്കുമെന്ന് കുവൈത്ത് എയർവേയ്സ് സിഇഒ അബ്ദുൽ വഹാബ് അൽ ഷാത്തി പറഞ്ഞു. യാത്രക്കാർക്ക് ഏറ്റവും സു​ഖകരമായ രീതിയിലുള്ള സേവനങ്ങൾ ഉറപ്പുവരുത്തുമെന്നും അദ്ദേഹം കൂട്ടിച്ചേർത്തു.

എയർലൈനിൻ്റെ വെബ്സൈറ്റിലൂടെയോ മൊബൈൽ അപ്ലിക്കേഷൻ ഉപയോ​ഗിച്ചോ ഉപഭോക്താക്കൾക്ക് ടിക്കറ്റ് ബുക്ക് ചെയ്യാവുന്നതാണ്. ഫെബ്രുവരി 15 വരെ ആവശ്യക്കാർക്ക് ബുക്ക് ചെയ്യാവുന്നതാണ്. ജനുവരി 25 മുതൽ ഏപ്രിൽ 30 വരെയാണ് യാത്രാകാലയളവ്.