മാൻ ഹോളിൽ വീണ് അപകടം; കോട്ടയം സ്വദേശിനി ഒമാനിൽ ഗുരുതരാവസ്ഥയിൽ

സലാല: ഒമാനിലെ സലാലക്കടുത്ത് മെസ്യൂണയിൽ മാൻ ഹോളിൽ വീണ് മലയാളി നഴ്‌സിന് ഗുരുതര പരിക്കേറ്റു. കോട്ടയം പാമ്പാടി സ്വദേശി ലക്ഷ്മി വിജയകുമാർ (34) ആണ് അപകടത്തിൽ പെട്ട് ഗുരുതരാവസ്ഥയിലുള്ളത്. സലാലയിൽ നിന്ന് 200 കിലോമീറ്റർ അകലെ മസ്യൂണയിൽ ചൊവ്വാഴ്ച വൈകിട്ടാണ് സംഭവം. താമസ സ്ഥലത്തെ മാലിന്യം കളയാൻ ബലദിയ ഡ്രമിനടുത്തേക്ക് പോകുമ്പോളാണ് അറിയാതെ മാൻ ഹോളിൽ വീണതെന്നാണ് പ്രാഥമിക വിവരം. മാൻ ഹോളിൽ വീണ് ഗുരുതര പരിക്കേറ്റ ഇവരെ തൊട്ടടുത്ത ആശുപത്രിയിലും പിന്നീട് സുൽത്താൻ ഖാബൂസ് ആശുപത്രിയിലും എത്തിക്കുകയായിരുന്നു.

നിലവിൽ ഗുരുതരാവസ്ഥയിൽ വെന്റിലേറ്ററിലാണുള്ളത്. ഭർത്താവും ഏക കുട്ടിയും സംഭവമറിഞ്ഞ് സലാലയിലെത്തിയിട്ടുണ്ട്. മിനിസ്ട്രി ഓഫ് ഹെൽത്തിൽ സ്റ്റാഫ് നഴ്‌സായ ഇവർ ഒരു വർഷം മുമ്പാണ് നാട്ടിൽ നിന്ന് സലാലയിലെത്തുന്നത്. മെസ്യൂണയിലെ ഹെൽത്ത് സെൻററിലാണ് ഇവർ ജോലി ചെയ്തിരുന്നത്.