ട്രക്കുകൾ നിർത്തിയിടാൻ ദുബൈയിൽ ഹൈടെക്​ സൗകര്യം; ഡ്രൈവർമാർക്ക് വിശ്രമകേന്ദ്രം

ദുബൈ: ട്രക്കുകൾ നിർത്തിയിടാൻ ഇനി ദുബൈയിൽ ഹൈടെക്​ സൗകര്യം. 500 ട്രക്കുകളെ ഉൾകൊള്ളുന്ന 22,6000 സ്ക്വയർ മീറ്റർ വിസ്തൃതിയിലുള്ള സൗകര്യമാണ്​ ഇതിനായി ഒരുക്കുക. സ്വകാര്യമേഖലയുമായി സഹകരിച്ചാണ്​പദ്ധതി​.

ട്രക്കുകൾക്കായി മൂന്ന്​ കൂറ്റൻ വിശ്രമകേന്ദ്രങ്ങളാകും നിർമിക്കുക. ഇതിനായി റോഡ്​ഗതാഗത അതോറിറ്റി, അഡ്​നോക്​, അൽ മുതകാമില എന്നിവയുമായി കരാറിലെത്തി.അബൂദബി നാഷണൽ ഓയിൽ കമ്പനിയായ അഡ്​നോക്കിന്​ ഒരു കേന്ദ്രം നിർമിക്കാനുള്ള കരാറും വാഹന പരിശോധന, രജിസ്​ട്രേഷൻ വിഭാഗമായ അൽ മുതകാമിലക്ക് ​രണ്ട്​ കരാറുകളുമാണ്​നൽകിയത്​. ട്രക്കുകൾക്ക്​ പുറമെ, ഭാരമേറിയ മറ്റു വാഹനങ്ങൾക്കും കേന്ദ്രത്തിൽ പ്രവേശനം അനുവദിക്കും.

ഡ്രൈവർമാർക്ക് ​താമസ സൗകര്യം, അറ്റകുറ്റ പണികൾക്ക്​ വർക്​ഷോപ്പ്​, റസ്റ്ററന്‍റുകൾ, അഡ്മിനിസ്ട്രേറ്റിവ് ​കെട്ടിടം, പ്രാർഥനാ മുറികൾ, ഡ്രൈവർമാർക്ക്​ പരിശീലന കേന്ദ്രം, ക്ലിനിക്ക്​, ഫാർമസി, എക്സ്​ചേഞ്ച് ​ഷോപ്പുകൾ, ലോൺട്രി എന്നിങ്ങനെ വിവിധ സൗകര്യങ്ങൾ കേന്ദ്രങ്ങളിൽ ഒരുക്കും. ഡ്രൈവർമാരുടെ സുരക്ഷിതത്വവും സൗകര്യവും ഉറപ്പുവരുത്തുന്നതിന്‍റെ ഭാഗമായാണ്​ ആർ.ടി.എ പദ്ധതി നടപ്പിലാക്കുന്നത്​.