അടുക്കളയിൽ സാധാരണയായി ഉപയോഗിക്കുന്ന വസ്തുക്കളാണ് ബേക്കിങ് പൗഡറും ബേക്കിങ് സോഡയും. കാഴ്ചയിൽ ഇവ ഒരുപോലെ തോന്നുമെങ്കിലും രണ്ടും പാചകത്തിന് ഉപയോഗിക്കുന്നുണ്ടെങ്കിലും രണ്ടും രണ്ടാണ്. കേക്കും മറ്റ് പലഹാരങ്ങളും ഉണ്ടാക്കാൻ ബേക്കിങ് സോഡയാണോ അതോ പൗഡറാണോ ഉപയോഗിക്കേണ്ടത് എന്ന ആശയക്കുഴപ്പം പലര്ക്കുമുണ്ടാകും. ഇവ തമ്മിലുള്ള വ്യത്യാസം എന്താണെന്ന് നോക്കാം.
ബേക്കിങ് സോഡ
ബേക്കിങ് സോഡ ശുദ്ധമായ സോഡിയം ബൈകാർബണേറ്റ് ആണ്.ബേക്കിങ് സോഡ വേഗത്തിൽ പ്രവർത്തിക്കുന്ന ഒരു പുളിപ്പിക്കൽ ഏജന്റാണ്. ശുദ്ധമായ ബേക്കിംഗ് സോഡ ഈർപ്പവും തേൻ, ബട്ടർ മിൽക്ക്, മൊളാസസ്, ചോക്ലേറ്റ്, തൈര്, സോർ ക്രീം, ബ്രൗൺ ഷുഗർ, അല്ലെങ്കിൽ കൊക്കോ പോലുള്ള അസിഡിറ്റി ഉള്ള ചേരുവയുമായി കലർത്തുമ്പോൾ രാസപ്രവർത്തനം സംഭവിക്കുന്നു. അത് കാർബൺ ഡൈ ഓക്സൈഡിന്റെ കുമിളകൾ ഉണ്ടാക്കുന്നു. ബേക്കിങ്ങിൽ നിങ്ങൾക്ക് ആവശ്യമുള്ള നേരിയ ഘടന നൽകുന്നത് ഈ കുമിളകളാണ്.കേക്കുകളും കുക്കികളുമെല്ലാം പെട്ടെന്ന് പൊങ്ങിവരാൻ സഹായിക്കുന്നതുകൊണ്ടാണ് ബേക്കിങ് സോഡ ഉപയോഗിക്കുന്നത്.
ബേക്കിങ് പൗഡര്
ബേക്കിങ് സോഡ, അസിഡിക് ലവണങ്ങൾ അല്ലെങ്കിൽ ഡ്രൈ ആസിഡുകൾ, പലപ്പോഴും കോൺ സ്റ്റാർച്ച് പോലുള്ള അന്നജം എന്നിവ അടങ്ങിയ ഒരു മിശ്രിതമാണ് ബേക്കിങ് പൗഡര്. ബേക്കിങ് പൗഡറിൽ സാധാരണയായി ടാർടാറിക് ആസിഡ് അടങ്ങിയിട്ടുണ്ട്. ഇത് സാധാരണയായി ക്രീം ഓഫ് ടാർട്ടാർ എന്നറിയപ്പെടുന്നു. ടാർട്ടർ ക്രീം ഒരു ഡ്രൈ ആസിഡാണ്. പാചകത്തിന് ബേക്കിങ് പൗഡര് ഉപയോഗിക്കുമ്പോൾ കാർബൺ ഡൈ ഓക്സൈഡ് കുമിളകൾ ഒരേസമയം ഉത്പാദിപ്പിക്കുന്ന അസിഡിക് ചേരുവയാണ് നിങ്ങൾ ചേർക്കുന്നത്. സാധാരണയായി, മൊളാസസ് അല്ലെങ്കിൽ ബട്ടർ മിൽക്ക് പോലുള്ള അസിഡിക് ചേരുവകൾ ഇല്ലാത്ത പാചകക്കുറിപ്പുകളിൽ ബേക്കിങ് പൗഡർ ആവശ്യമാണ്.
ബേക്കിങ് സോഡക്ക് പകരം ബേക്കിങ് പൗഡര് ഉപയോഗിക്കാമോ?
ബേക്കിങ് സോഡക്ക് പകരം ബേക്കിങ് പൗഡര് ഉപയോഗിക്കാമോ എന്നത് പലര്ക്കുമുള്ള സംശയമാണ്. ഉപയോഗിക്കുന്നതിൽ പ്രശ്നമൊന്നുമില്ല, എന്നാൽ അളവിൽ അൽപം വ്യത്യാസം വരുത്തണമെന്ന് മാത്രം. ബേക്കിങ് സോഡയ്ക്ക് പകരം ബേക്കിങ് പൗഡറാണ് ഉപയോഗിക്കുന്നതെങ്കില് ഒരു ടീസ്പൂണ് ബേക്കിങ് സോഡ ചേര്ക്കാൻ ആവശ്യപ്പെടുന്നിടത്ത് മൂന്ന് ടീസ്പൂണ് ബേക്കിങ് പൗഡര് ചേര്ക്കണം. ബേക്കിങ് പൗഡറിന് പകരം ബേക്കിങ് സോഡയാണ് ഉപയോഗിക്കുന്നതെങ്കിൽ ബേക്കിങ് സോഡയുടെ അളവ് കുറയ്ക്കണം.