മോരുംവെള്ളം എല്ലാവർക്കും നല്ലതല്ല; ഈ അഞ്ച് പ്രശ്നങ്ങളുള്ളവർ ഒരിക്കലും കുടിക്കരുത്!

പൊള്ളുന്ന ചൂടല്ലേ, ഒരു ​ഗ്ലാസ് സംഭാരമായാലോ? കുടിക്കാൻ വരട്ടെ, പറയാം... വേനൽക്കാലത്ത് മലയാളികളുടെ പ്രിയപ്പെട്ട പാനീയങ്ങളിൽ ഒന്നാമനാണ് സംഭാരം അഥവാ മോരുംവെള്ളം. ഒരു ഗ്ലാസ് തണുത്ത മോരുംവെള്ളം കുടിക്കുമ്പോൾ ലഭിക്കുന്ന ആശ്വാസവും ഉന്മേഷവും മറ്റേതൊരു വിലകൂടിയ ശീതളപാനീയത്തേക്കാളും വലുതാണ്. ദഹനത്തിനും ശരീരത്തിലെ ചൂട് കുറയ്ക്കാനും മോര് സഹായിക്കുമെന്ന കാര്യത്തിൽ ആർക്കും തർക്കമില്ല. പ്രോബയോട്ടിക് ഗുണങ്ങളാൽ സമ്പന്നമായതിനാൽ കുടലിന്റെ ആരോഗ്യത്തിനും ഇത് ഉത്തമമാണ്. എന്നാൽ എല്ലാവർക്കും മോരുംവെള്ളം ഒരുപോലെ ഗുണകരമാകണമെന്നില്ല. നിങ്ങളുടെ ശരീരപ്രകൃതിയും നിലവിലുള്ള ആരോഗ്യപ്രശ്നങ്ങളും അനുസരിച്ച് മോര് ചിലപ്പോൾ വില്ലനായേക്കാം. മോരുംവെള്ളം ഒഴിവാക്കേണ്ട അല്ലെങ്കിൽ നിയന്ത്രിക്കേണ്ട അഞ്ച് വിഭാഗം ആളുകൾ ആരൊക്കെയാണെന്ന് നമുക്ക് വിശദമായി പരിശോധിക്കാം.

വൃക്കസംബന്ധമായ അസുഖങ്ങളുള്ളവർ മോരുംവെള്ളം കുടിക്കുമ്പോൾ വലിയ ജാഗ്രത പാലിക്കണം. മോരിൽ അടങ്ങിയിരിക്കുന്ന ഉയർന്ന അളവിലുള്ള പൊട്ടാസ്യവും സോഡിയവും വൃക്കകളുടെ പ്രവർത്തനത്തെ ബാധിച്ചേക്കാം. വൃക്കകൾക്ക് ഈ ഘടകങ്ങളെ കൃത്യമായി അരിച്ചെടുക്കാൻ സാധിക്കാതെ വരുമ്പോൾ അത് ശരീരത്തിൽ അടിഞ്ഞുകൂടുകയും ഗുരുതരമായ ആരോഗ്യപ്രശ്നങ്ങളിലേക്ക് നയിക്കുകയും ചെയ്യും. പ്രത്യേകിച്ചും ഡയാലിസിസ് ചെയ്യുന്നവരോ അല്ലെങ്കിൽ ക്രോണിക് കിഡ്നി ഡിസീസ് ഉള്ളവരോ മോരുംവെള്ളം കുടിക്കുന്നത് ഡോക്ടറുടെ നിർദേശപ്രകാരം മാത്രമായിരിക്കണം. ശരീരത്തിലെ ദ്രാവക നില നിയന്ത്രിക്കാൻ ബുദ്ധിമുട്ടുള്ളവർക്ക് ഇത് അധികഭാരമാകും.

സന്ധിവേദന അല്ലെങ്കിൽ ആർത്രൈറ്റിസ് പ്രശ്നങ്ങളുള്ളവർക്കും മോരുംവെള്ളം അത്ര നല്ലതല്ല. മോര് തൈരിൽ നിന്ന് നിർമ്മിക്കുന്നതാണ്. തൈരിന് സ്വാഭാവികമായും പുളിയും തണുപ്പും ഉണ്ട്. ഇത് സന്ധികളിലെ വീക്കം വർധിപ്പിക്കാൻ കാരണമായേക്കാം. പ്രത്യേകിച്ച് തണുപ്പുള്ള കാലാവസ്ഥയിലോ രാത്രിയിലോ മോര് കഴിക്കുന്നത് സന്ധികളിൽ കടുത്ത വേദനയ്ക്കും അസ്വസ്ഥതയ്ക്കും ഇടയാക്കും. യൂറിക് ആസിഡ് കൂടുതലുള്ളവർക്കും മോര് അമിതമാകുന്നത് ദോഷകരമാണ്. വാതസംബന്ധമായ അസുഖങ്ങൾ ഉള്ളവർക്ക് മോര് കഴിക്കുന്നത് പേശികളിലെ മുറുക്കം വർധിപ്പിക്കാനും സാധ്യതയുണ്ട്.

ശ്വസനസംബന്ധമായ ബുദ്ധിമുട്ടുകൾ, ജലദോഷം, ചുമ, സൈനസൈറ്റിസ് എന്നിവയുള്ളവർ സംഭാരം കുടിക്കുമ്പോൾ ശ്രദ്ധിക്കണം. മോരിന് സ്വാഭാവികമായും ശരീരം തണുപ്പിക്കാനുള്ള കഴിവുണ്ട്. ആയുർവേദ പ്രകാരം ഇത് കഫം വർധിപ്പിക്കാൻ കാരണമാകും. ശ്വാസകോശത്തിലെ കഫക്കെട്ട് വർധിപ്പിക്കാനും ശ്വാസംമുട്ടൽ പോലുള്ള പ്രശ്നങ്ങൾ വഷളാക്കാനും മോര് കുടിക്കുന്നത് കാരണമായേക്കാം. രാത്രിയിൽ മോര് കഴിക്കുന്നത് ഇത്തരം ആളുകളിൽ അലർജിയും കഫശല്യവും കൂട്ടാൻ സാധ്യതയുണ്ട്. അതിനാൽ പനിയോ ജലദോഷമോ ഉള്ളപ്പോൾ മോര് ഒഴിവാക്കുന്നതാണ് ഏറ്റവും ഉചിതം. കുട്ടികളിലും മുതിർന്നവരിലും ഒരുപോലെ ഈ പ്രശ്നം കണ്ടുവരാറുണ്ട്.

മറ്റൊന്ന് ലാക്ടോസ് ഇൻടോറൻസുള്ളവരാണ്. ലാക്ടോസ് ഇൻടോളറൻസ് ഉള്ളവർക്ക് പാലുൽപ്പന്നങ്ങൾ ദഹിപ്പിക്കാൻ ബുദ്ധിമുട്ടായിരിക്കും. പാലിൽ അടങ്ങിയിരിക്കുന്ന ലാക്ടോസ് എന്ന പഞ്ചസാരയെ വിഘടിപ്പിക്കാൻ ഇവർക്ക് സാധിക്കില്ല. പാൽ തൈരായി മാറുന്ന പ്രക്രിയയിൽ ലാക്ടോസിന്റെ അളവ് കുറയുമെങ്കിലും, തീവ്രമായ ലാക്ടോസ് ഇൻടോളറൻസ് ഉള്ളവർക്ക് മോര് കുടിക്കുന്നത് വയറിളക്കം, ഗ്യാസ്, വയറുവേദന എന്നിവയുണ്ടാക്കാൻ കാരണമാകും. ഇത്തരം അസ്വസ്ഥതകൾ സ്ഥിരമായി അനുഭവപ്പെടുന്നവർ മോരുംവെള്ളം ഒഴിവാക്കുന്നതാണ് നല്ലത്. പകരം ലാക്ടോസ് രഹിതമായ പാനീയങ്ങൾ ഇവർക്ക് തിരഞ്ഞെടുക്കാം.

രക്തസമ്മർദത്തിന് മരുന്ന് കഴിക്കുന്നവരും ഹൃദ്രോഗികളും മോരിൽ ചേർക്കുന്ന ഉപ്പിന്റെ അളവ് ശ്രദ്ധിക്കണം. ഉപ്പ് ചേർക്കാതെ മോര് കുടിക്കുന്നത് അത്ര ഇഷ്ടമില്ലാത്തതിനാൽ മിക്കവരും ധാരാളം ഉപ്പ് അതിൽ ചേർക്കാറുണ്ട്. ഉപ്പ് ചേർത്ത മോരുംവെള്ളം അമിതമായി കുടിക്കുന്നത് ശരീരത്തിലെ സോഡിയത്തിന്റെ അളവ് വർധിപ്പിക്കുകയും രക്തസമ്മർദം ഉയർത്തുകയും ചെയ്യും. ഇത് ഹൃദയാരോഗ്യത്തിന് വെല്ലുവിളിയാണ്. ഹൈപ്പർ ടെൻഷൻ ഉള്ളവർക്ക് ഇത് സ്ട്രോക്ക് പോലുള്ള അപകടങ്ങളിലേക്ക് നയിച്ചേക്കാം. അതിനാൽ ഉപ്പ് കുറച്ച് മാത്രം ഉപയോഗിക്കാൻ ശ്രദ്ധിക്കുക അല്ലെങ്കിൽ ഉപ്പിന് പകരം ഇഞ്ചി, പച്ചമുളക്, കറിവേപ്പില എന്നിവയുടെ അളവ് കൂട്ടി രുചി വർധിപ്പിക്കാം.

സംഭാരം തയ്യാറാക്കുമ്പോൾ ഇഞ്ചി, കറിവേപ്പില, പച്ചമുളക് എന്നിവ ചേർക്കുന്നത് ദഹനത്തിന് നല്ലതാണ്. എന്നാൽ അത് കുടിക്കുന്ന സമയം വളരെ പ്രധാനമാണ്. വെറും വയറ്റിൽ അമിതമായി പുളിയുള്ള മോര് കുടിക്കുന്നത് അസിഡിറ്റിക്ക് കാരണമായേക്കാം. പകൽ സമയത്ത് ഉച്ചഭക്ഷണത്തിന് ഒപ്പം മോര് കുടിക്കുന്നതാണ് ഏറ്റവും നല്ലത്. രാത്രിയിൽ മോര് കഴിക്കുന്നത് ഒഴിവാക്കാൻ പരമാവധി ശ്രമിക്കണം.

ആരോഗ്യവാൻമാരായ ആളുകൾക്ക് മോരുംവെള്ളം മികച്ചൊരു പാനീയമാണെങ്കിലും നേരത്തേ പറഞ്ഞ ആരോഗ്യപ്രശ്നങ്ങൾ ഉള്ളവർ അതിന്റെ ഉപയോഗത്തിൽ നിയന്ത്രണം ഏർപ്പെടുത്തണം. വേനൽക്കാലത്ത് ശരീരം ഹൈഡ്രേറ്റഡ് ആയി നിലനിർത്താൻ മോരിന് പകരം ഇളനീരോ ശുദ്ധമായ വെള്ളമോ അല്ലെങ്കിൽ നാരങ്ങ വെള്ളമോ തിരഞ്ഞെടുക്കാവുന്നതാണ്. ഏത് ഭക്ഷണമായാലും അത് നിങ്ങളുടെ ശരീരത്തിന് അനുയോജ്യമാണോ എന്ന് തിരിച്ചറിഞ്ഞ് കഴിക്കുന്നതാണ് ഉത്തമം. ആരോഗ്യമാണ് നമ്മുടെ ഏറ്റവും വലിയ സമ്പത്ത്, അത് കാത്തുസൂക്ഷിക്കാൻ ഭക്ഷണരീതിയിൽ ചെറിയ മാറ്റങ്ങൾ വരുത്താം.