അസമിലെ ധുബ്രിയിൽ 812 മുസ്‌ലിം കുടുംബങ്ങൾക്ക് കുടിയൊഴിപ്പിക്കൽ നോട്ടീസ്; വൈദ്യുതി വിച്ഛേദിച്ചു

ഗുവാഹതി: അസമിലെ ധുബ്രി ജില്ലയിൽ നൂറുകണക്കിന് കുടുംബങ്ങളെ വഴിയാധാരമാക്കുന്ന നടപടികളുമായി ജില്ലാ ഭരണകൂടം. ധുബ്രിയിലെ ആലംഗഞ്ചിൽ താമസിക്കുന്ന 812 മുസ്‌ലിം കുടുംബങ്ങളോട് 15 ദിവസത്തിനകം സ്വന്തം വീടുകൾ ഒഴിഞ്ഞു പോകണമെന്നാണ് അധികൃതർ ഉത്തരവിട്ടിരിക്കുന്നത്.

കയ്യേറ്റം ആരോപിച്ച് നോട്ടീസ്

സർക്കാർ ഭൂമി കൈയേറിയാണ് കുടുംബങ്ങൾ താമസിക്കുന്നതെന്ന് ആരോപിച്ചാണ് ജില്ലാ ഭരണകൂടം കുടിയൊഴിപ്പിക്കൽ നോട്ടീസ് നൽകിയിരിക്കുന്നത്. തൊട്ടുപിന്നാലെ പ്രദേശത്തേക്കുള്ള വൈദ്യുതി ബന്ധം അധികൃതർ വിച്ഛേദിച്ചു. അടിസ്ഥാന സൗകര്യങ്ങൾ റദ്ദാക്കിയതോടെ സ്ത്രീകളും കുട്ടികളും അടക്കമുള്ള പ്രദേശവാസികൾ കടുത്ത പ്രതിസന്ധിയിലായിരിക്കുകയാണ്.

വീടുകൾ സ്വയം പൊളിച്ചുമാറ്റി നാട്ടുകാർ

15 ദിവസത്തെ സമയപരിധി നിശ്ചയിച്ച് നോട്ടീസ് പതിക്കുകയും വൈദ്യുതി വിച്ഛേദിക്കുകയും ചെയ്തതോടെ ഭയന്ന കുടുംബങ്ങൾ വീടുകൾ സ്വന്തം നിലയ്ക്ക് പൊളിച്ചുമാറ്റിത്തുടങ്ങി. തങ്ങളുടെ വീട്ടുസാധനങ്ങളും കെട്ടിടനിർമാണ സാമഗ്രികളും നഷ്ടപ്പെടാതിരിക്കാൻ സാധനങ്ങൾ കെട്ടിപ്പെറുക്കി മറ്റിടങ്ങളിലേക്ക് മാറ്റുന്ന തിരക്കിലാണ് നാട്ടുകാർ. ഇത്രയധികം കുടുംബങ്ങൾക്ക് മുന്നറിയിപ്പില്ലാതെ ഒഴിഞ്ഞുപോകാൻ ചുരുങ്ങിയ ദിവസങ്ങൾ മാത്രം നൽകിയത് മനുഷ്യാവകാശ ലംഘനമാണെന്ന പരാതികളും ഉയരുന്നുണ്ട്.

തുടർക്കഥയാകുന്ന ഒഴിപ്പിക്കൽ നടപടികൾ

കഴിഞ്ഞ ഏതാനും വർഷങ്ങളായി അസമിൽ സർക്കാർ ഭൂമി തിരിച്ചുപിടിക്കാനെന്ന പേരിൽ വ്യാപക കുടിയൊഴിപ്പിക്കൽ ഡ്രൈവുകളാണ് ഹിമന്ത ബിശ്വ ശർമ്മയുടെ നേതൃത്വത്തിലുള്ള സർക്കാർ നടപ്പിലാക്കുന്നത്. ദരാങ്, നാഗോൺ, ലഖിംപൂർ, സോനിത്പൂർ, ധുബ്രി തുടങ്ങിയ ജില്ലകളിലെ മുസ്‌ലിം കേന്ദ്രങ്ങളിലാണ് ഇത്തരത്തിൽ വലിയ തോതിൽ ഒഴിപ്പിക്കലുകൾ അരങ്ങേറിയത്. തലമുറകളായി ജീവിച്ചുപോരുന്ന ഭൂമിയിൽ നിന്നാണ് പുനരധിവാസമോ മതിയായ സാവകാശമോ നൽകാതെ കുടുംബങ്ങൾ തെരുവിലേക്ക് എറിയപ്പെടുന്നത്. മതിയായ രേഖകളില്ലെന്ന് ചൂണ്ടിക്കാട്ടി സർക്കാർ നടപടികൾ തുടരുമ്പോൾ, ബദൽ താമസസൗകര്യമൊരുക്കാതെയുള്ള ഭരണകൂട നീക്കത്തിനെതിരെ വലിയ പ്രതിഷേധങ്ങളും നിയമപോരാട്ടങ്ങളും സംസ്ഥാനത്ത് നടക്കുന്നുണ്ട്.