പനാജി: പണം തട്ടാനായി യുവാവിനെതിരെ വ്യാജ പീഡന പരാതി നൽകിയ രണ്ട് സ്ത്രീകളും ഇവരുടെ സഹായിയായ പുരുഷനും അറസ്റ്റിൽ. ഗോവ പൊലീസാണ് മൂന്നുപേരെയും പിടികൂടിയത്. പണം തട്ടിയെടുക്കാനുള്ള ലക്ഷ്യത്തോടെ യുവതികൾ താനുമായി സൗഹൃദമുണ്ടാക്കുകയും പിന്നീട് വ്യാജ പീഡന പരാതി നൽകിയെന്നുമുള്ള ഗുജറാത്ത് സ്വദേശിയുടെ പരാതിയിലാണ് അറസ്റ്റെന്ന് നോർത്ത് ഗോവ പൊലീസ് എസ്.പി നിധിൻ വൽസൻ പറഞ്ഞു.
തിങ്കളാഴ്ചയാണ് പൊലീസ് മൂന്നുപേരെയും അറസ്റ്റ് ചെയ്തത്. അന്വേഷണത്തിനിടെ പൂനെ സ്വദേശിയായ ബിസിനസുകാരന്റെ പരാതിയും ലഭിച്ചതായി പൊലീസ് പറഞ്ഞു. വ്യാജ പീഡന പരാതി നൽകുമെന്ന് ഭീഷണിപ്പെടുത്തി രണ്ട് ലക്ഷം രൂപ തട്ടിയെടുത്തെന്നായിരുന്നു പരാതി.
പൊലീസ് നടത്തിയ അന്വേഷണത്തിൽ യുവതികൾ ഗുജറാത്തിലും ഗോവയിലുമായി നിരവധി പേർക്കെതിരെ പീഡന പരാതികൾ നൽകിയതായി കണ്ടെത്തി. സ്ത്രീകളിലൊരാൾ ആഗസ്റ്റ് 23ന് ഗോവയിലെ കോൽവാലേയിൽ നൽകിയ പരാതിയെ തുടർന്ന് പൊലീസ് ഒരാളെ അറസ്റ്റ് ചെയ്തിരുന്നു.