മൊഡേണ വാക്​സിൻ ഉടൻ ഇന്ത്യയിൽ; തുടക്കത്തിൽ ലഭ്യമാകുക തെരഞ്ഞെടുത്ത ആശുപത്രികളിൽ

അമേരിക്കൻ മരുന്ന്​ നിർമാതാക്കളായ മൊ​ഡേണയുടെ കോവിഡ്​ വാക്​സിൻ ഈ മാസം പകുതിയോടെ രാജ്യത്ത് ലഭ്യമാകുമെന്ന്​ റിപ്പോർട്ട്​. മൊഡേണ വാക്​സിൻ കോവിഡിനെതിരെ 90 ശതമാനം പ്രതിരോധം നൽകുമെന്നാണ്​ കണ്ടെത്തിയിരുന്നു​. തുടക്കത്തിൽ തെരഞ്ഞെടുക്കപ്പെട്ട ആശുപത്രികളിലാവും വാക്സിൻ ലഭ്യമാകുക. ജൂ​ലൈ പകുതിയോടെ മൊഡേണ വാക്​സിൻ ചില മേജർ ആശുപത്രികളിൽ എത്തുമെന്ന്​ എക്കണോമിക്​ ടൈംസ്​ റിപ്പോർട്ട്​ ചെയ്​തു.

സിപ്ലക്ക് കഴിഞ്ഞ ആഴ്​ചയാണ്​ ​വാക്​സിൻ ഇറക്കുമതി ചെയ്യാൻ ഡ്രഗ്​ റെഗുലേറ്ററുടെ അനുമതി ലഭിച്ചത്​. ഇറക്കുമതി ചെയ്യുന്ന വാക്​സിൻ കേന്ദ്ര സർക്കാറിന്​ കൈമാറുകയും അവ സൂക്ഷിച്ച്​ വെക്കാൻ സൗകര്യമുള്ള രാജ്യത്തെ മെട്രോ നഗരങ്ങളിലുള്ള ആശുപത്രിയിലേക്ക്​ മാറ്റുകയും ചെയ്യും.

ഏഴ്​ മാസം ​വാക്​സിൻ സൂക്ഷിച്ച്​ വെക്കാൻ മൈനസ്​ 20 ഡിഗ്രി സെൽഷ്യസ്​ താപനില ആവശ്യമാണ്​. ഒരുമാസത്തേക്ക്​ സൂക്ഷിക്കാൻ 2-8 ഡിഗ്രി സെൽഷ്യസ്​ താപനില മതിയാകും. 28 ദിവസത്തെ ഇടവേളയിൽ രണ്ട്​ ഡോസായാണ് വാക്​സിൻ നൽകുക. അൾട്രാ കോൾഡ്​ ചെയിൻ ഉപകരണങ്ങൾ ലഭ്യമായ ആശുപത്രികളിലായിരിക്കും മൊഡേണ വാക്​സിൻ ലഭ്യമാകുകയെന്ന് അധികൃതർ പറഞ്ഞു.

രാജ്യത്ത്​ ഇതുവരെ 35 കോടി ഡോസ്​ വാക്​സിൻ വിതരണം ചെയ്​തു കഴിഞ്ഞു. പ്രായപൂർത്തിയായ എല്ലാവരെയും ഈ വർഷം അവസാനത്തോടെ വാക്​സിനേഷന്​ വിധേയമാക്കാനാണ്​ സർക്കാർ ലക്ഷ്യമിടുന്നത്​. കോവിഷീൽഡ്​, കോവാക്​സിൻ, സ്​പുട്​നിക്​ വി, മൊഡേണ എന്നീ വാക്​സിനുകൾക്കാണ്​ ഇന്ത്യയിൽ അനുമതി ലഭിച്ചത്​.