കർണാടക എസ്‌ഐആർ: വോട്ടർപട്ടികയിൽനിന്ന് പേര് നീക്കാനുള്ള അപേക്ഷകളിൽ ഒരു മാസത്തിനിടെ വൻ വർധന

ബെംഗളൂരു: കർണാടകയിൽ വോട്ടർപട്ടിക പ്രത്യേക തീവ്ര പുനഃപരിശോധന നടപടികൾ പുരോഗമിക്കുന്നതിനിടെ, വോട്ടർമാരെ പട്ടികയിൽനിന്ന് ഒഴിവാക്കാനും ഉൾപ്പെടുത്തുന്നതിനെതിരെ ആക്ഷേപം ഉന്നയിക്കാനുമുള്ള 'ഫോം 7' അപേക്ഷകളിൽ വൻ വർധനവ്. ജൂൺ 16 മുതൽ ഒക്ടോബർ 22 വരെയുള്ള കാലയളവിൽ സംസ്ഥാനത്ത് ആകെ 2,28,917 ഫോം 7 അപേക്ഷകൾ തെരഞ്ഞെടുപ്പ് കമ്മീഷന് ലഭിച്ചതായി ഔദ്യോഗിക കണക്കുകൾ വ്യക്തമാക്കുന്നു.

സെപ്റ്റംബർ 23 വരെ ലഭിച്ച ഫോം 7 അപേക്ഷകളുടെ എണ്ണം 58,475 മാത്രമായിരുന്നു. എന്നാൽ തുടർന്നുള്ള ഒരു മാസത്തിനിടെ 1,70,442 അപേക്ഷകളാണ് പുതുതായി സമർപ്പിക്കപ്പെട്ടത്. സെപ്റ്റംബർ 23 വരെ ലഭിച്ച എല്ലാ അപേക്ഷകളിലും മുൻഗണനാടിസ്ഥാനത്തിൽ നടപടികൾ പൂർത്തിയാക്കിയതായി കർണാടക ചീഫ് ഇലക്ടറൽ ഓഫീസറുടെ (സിഇഒ) കാര്യാലയം പ്രസ്താവനയിൽ അറിയിച്ചു. വോട്ടർപട്ടികയുടെ അന്തിമരൂപം ഒക്ടോബർ 27-ന് പ്രസിദ്ധീകരിക്കും.

രാഷ്ട്രീയ വിവാദവും ക്രമക്കേട് ആരോപണങ്ങളും

ഫോം 7 അപേക്ഷകൾ വ്യാപകമായി ദുരുപയോഗം ചെയ്യപ്പെടുന്നു എന്ന ആരോപണം സംസ്ഥാനത്ത് വലിയ രാഷ്ട്രീയ വിവാദങ്ങൾക്ക് വഴിവെച്ചിട്ടുണ്ട്. പ്രതിപക്ഷമായ ബിജെപി കൂട്ടത്തോടെ ഇത്തരം അപേക്ഷകൾ സമർപ്പിച്ച് കൃത്രിമം കാണിക്കുന്നു എന്നാണ് ഭരണകക്ഷിയായ കോൺഗ്രസിന്റെ ആരോപണം. വിഷയത്തിൽ ഈ മാസം ആദ്യം മുഖ്യമന്ത്രി ഡി.കെ ശിവകുമാറിന്റെ നേതൃത്വത്തിൽ കോൺഗ്രസ് സിഇഒ ഓഫീസിന് മുന്നിൽ പ്രതിഷേധം സംഘടിപ്പിച്ചിരുന്നു. ഇതിനെത്തുടർന്ന് ഇലക്ടറൽ രജിസ്‌ട്രേഷൻ ഓഫീസർമാർ (ഇആർഒ) വഴി അന്വേഷണം നടത്താൻ തെരഞ്ഞെടുപ്പ് കമ്മീഷൻ നിർദേശം നൽകി. എന്നാൽ, കോൺഗ്രസിന്റെ ആരോപണങ്ങൾ ബിജെപി തള്ളി.

വ്യാപകമായി ഫോം 7 സമർപ്പിക്കപ്പെട്ട സംഭവങ്ങളിൽ സംസ്ഥാനത്തെ വിവിധ പൊലീസ് സ്റ്റേഷനുകളിലായി പത്തിലധികം എഫ്‌ഐആറുകൾ രജിസ്റ്റർ ചെയ്തിട്ടുണ്ട്. ബിജാപ്പൂരിലാണ് ഇത്തരം കൂട്ട അപേക്ഷകളുടെ ആദ്യ വിവരങ്ങൾ പുറത്തുവന്നത്. ഇവിടെ മാത്രം 4,666 അപേക്ഷകളാണ് ലഭിച്ചത്.

കൂടുതൽ ആക്ഷേപങ്ങൾ ബെംഗളൂരുവിൽനിന്ന്

തെരഞ്ഞെടുപ്പ് കമ്മീഷന്റെ കണക്കുകൾ പ്രകാരം ഏറ്റവും കൂടുതൽ ഫോം 7 അപേക്ഷകൾ ലഭിച്ചത് ബെംഗളൂരു അർബൻ ജില്ലയിൽ നിന്നാണ്-24,268 അപേക്ഷകൾ. ബിബിഎംപി സൗത്തിൽ നിന്ന് 19,662 ഉം ബിബിഎംപി നോർത്തിൽ നിന്ന് 18,659 ഉം അപേക്ഷകൾ ലഭിച്ചു. ദക്ഷിണ കന്നഡ ജില്ലയിൽ നിന്ന് 10,496 ആക്ഷേപങ്ങളാണ് സമർപ്പിക്കപ്പെട്ടത്.

ഇതിനുപുറമെ, വോട്ടർപട്ടികയിൽ പേര് ചേർക്കുന്നതിനായുള്ള ഫോം 6 വഴി 10.42 ലക്ഷം അപേക്ഷകളും, മേൽവിലാസം തിരുത്തൽ അടക്കമുള്ള മാറ്റങ്ങൾക്കായുള്ള ഫോം 8 വഴി 13.10 ലക്ഷം അപേക്ഷകളും തെരഞ്ഞെടുപ്പ് കമ്മീഷന് ലഭിച്ചിട്ടുണ്ട്.

വോട്ടർമാരുടെ എണ്ണത്തിൽ വലിയ കുറവ്

ആഗസ്റ്റിൽ വിവരശേഖരണ ഘട്ടം പൂർത്തിയായതുമുതൽ എസ്‌ഐആർ പ്രക്രിയ കർണാടകയിൽ വലിയ രാഷ്ട്രീയ-സാമൂഹിക ചർച്ചകൾക്ക് കാരണമായിട്ടുണ്ട്. വിവരശേഖരണ വേളയിൽ 1.08 കോടിയിലധികം പേരാണ് കരട് പട്ടികയിൽനിന്ന് പുറത്തായത്. ഇതോടെ സംസ്ഥാനത്തെ ആകെ വോട്ടർമാരുടെ എണ്ണം 5.54 കോടിയിൽ നിന്ന് 4.46 കോടിയായി കുറഞ്ഞിരുന്നു.

കരട് പട്ടികയിലെ പരിശോധനാ വേളയിൽ നോട്ടീസ് ലഭിച്ച 43.82 ലക്ഷം വോട്ടർമാരുടെ ഹിയറിങ് നടപടികൾ പൂർത്തിയായതായി സിഇഒ ഓഫീസ് അറിയിച്ചു. ഇതിൽ 10 മുതൽ 13 ശതമാനം വരെ ആളുകൾ അന്തിമ പട്ടികയിൽനിന്ന് ഒഴിവാക്കപ്പെടാൻ സാധ്യതയുണ്ടെന്നാണ് വിവരം. ഇതോടെ, പുനഃപരിശോധനാ നടപടികൾക്ക് മുൻപുണ്ടായിരുന്ന പട്ടികയിലെ ഏകദേശം 1.2 കോടിയോളം വോട്ടർമാർ അന്തിമ പട്ടികയിൽനിന്ന് പുറത്താകുമെന്നാണ് കണക്കാക്കപ്പെടുന്നത്.