തന്റെ കാന്റീനില് കച്ചവടം കുറഞ്ഞതിലുള്ള ദേഷ്യത്താല് തൊട്ടടുത്ത് കച്ചവടം നടത്തിയ ചായക്കടക്കാരിയുടെ മൂക്ക് കാന്റീന് ഉടമ മുറിച്ചെടുത്തു. ഉത്തര്പ്രദേശിലെ കാണ്പൂരിലാണ് സംഭവം. കല്യാണ്പൂര് പൊലീസ് സ്റ്റേഷന് പരിധിയിലെ ആശുപത്രി പരിസരത്ത് കാന്റീന് നടത്തുന്ന വിനോദ് എന്നയാളാണ് തൊട്ടടുത്ത് ചായക്കച്ചവടം നടത്തിയ രേഖ എന്ന സ്ത്രീയുടെ മൂക്ക് മുറിച്ചെടുത്തത്.
രേഖ കാന്റീന് സമീപം ചായക്കട തുടങ്ങിയതാണ് ഇയാളെ പ്രകോപിപ്പിച്ചത്. ചായക്കട വന്നതോടെ കാന്റീനില് കച്ചവടം കുറഞ്ഞു. ചായക്കട ഒഴിവാക്കണമെന്ന് ഇയാള് ആവശ്യപ്പെട്ടെങ്കിലും യുവതി കൂട്ടാക്കിയില്ല. കഴിഞ്ഞ ദിവസം യുവതിയുമായി വഴക്കിട്ട ഇയാള് അവരെ തള്ളിത്താഴെയിട്ട് മൂര്ച്ചയേറിയ കത്തികൊണ്ട് മൂക്ക് മുറിക്കുകയായിരുന്നു.
അക്രമത്തിന് ശേഷവും വിനോദ് ഭീഷണിപ്പെടുത്തിയതായി യുവതി പൊലീസിന് നല്കിയ പരാതിയില് പറയുന്നു. ചില ബിസിനസ് തര്ക്കങ്ങളാണ് അക്രമത്തിന് കാരണമെന്നും വിനോദിനെതിരെ കേസ് രജിസ്റ്റര് ചെയ്തിട്ടുണ്ടെന്നും കല്യാണ്പൂര് പൊലീസ് സ്റ്റേഷന് ഇന്-ചാര്ജ് വീര് സിങ് പറഞ്ഞു.