ന്യൂഡൽഹി: സംവരണ തസ്തികകളിൽ അർഹരായ ഉദ്യോഗാർഥികളില്ലെങ്കിൽ ഉന്നത വിദ്യാഭ്യാസ സ്ഥാപനങ്ങളിലെ അധ്യാപക ഒഴിവുകൾ ജനറൽ വിഭാഗത്തിലേക്ക് മാറ്റില്ലെന്ന് കേന്ദ്ര വിദ്യാഭ്യാസ മന്ത്രാലയം. എസ്.സി, എസ്.ടി, ഒ.ബി.സി സംവരണ തസ്തികകൾ പൊതുവിഭാഗത്തിലേക്ക് മാറ്റുമെന്ന യു.ജി.സിയുടെ കരട് മാർഗനിർദേശം വിവാദമായ സാഹചര്യത്തിലാണ് മന്ത്രാലയത്തിന്റെ വിശദീകരണം. ഞായറാഴ്ചയായിരുന്നു ഈ വിഷയത്തിൽ പൊതുജനാഭിപ്രായം അറിയിക്കാനുള്ള അവസാന ദിനം.
2019ലെ കേന്ദ്ര വിദ്യാഭ്യാസ സ്ഥാപന (അധ്യാപക കേഡറിലെ സംവരണം) നിയമം അനുസരിച്ച് നേരിട്ടുള്ള നിയമനത്തിലെ എല്ലാ തസ്തികകൾക്കും സംവരണം ബാധകമാണെന്ന് കേന്ദ്ര വിദ്യാഭ്യാസ മന്ത്രാലയം എക്സിൽ പോസ്റ്റ് ചെയ്ത കുറിപ്പിൽ വ്യക്തമാക്കി. ഈ നിയമം പ്രാബല്യത്തിൽ വന്ന ശേഷം സംവരണ തസ്തിക സംവരണേതര തസ്തികയാക്കാനാകില്ല. 2019ലെ നിയമം അനുസരിച്ച് ഒഴിവുകൾ നികത്താൻ നിർദേശം നൽകിയിട്ടുണ്ടെന്നും വിദ്യാഭ്യാസ മന്ത്രാലയത്തിന്റെ കുറിപ്പിൽ പറയുന്നു.
💡Reservation in Central Educational Institutions (CEI) is provided for all posts in direct recruitment in Teacher’s cadre as per the Central Educational Institutions (Reservation in Teachers’ Cadre) Act, 2019.
— Ministry of Education (@EduMinOfIndia) January 28, 2024
After enactment of this Act, no reserved post is to be de-reserved.…
യു.ജി.സിയുടെ കരട് മാർഗനിർദേശം പുറത്തുവന്നതിന് പിന്നാലെ സംവരണം അട്ടിമറിയ്ക്കാനുള്ള ഗൂഢാലോചനക്കെതിരെ വലിയ പ്രതിഷേധം ഉയർന്നിരുന്നു. ജെ.എൻ.യു സ്റ്റുഡൻസ് യൂണിയൻ യു.ജി.സി ചെയർമാൻ എം. ജഗദീഷ് കുമാറിന്റെ കോലം കത്തിക്കുകയും ചെയ്തിരുന്നു.