കുംഭമേളക്കുള്ള ട്രെയിനിൽ കയറാനാകുന്നില്ല; എസി കോച്ചിന്‍റെ ​ചില്ല്​ തകർത്ത്​​ ഭക്​തർ

പട്​ന: കുംഭമേള നടക്കുന്ന പ്രയാഗ്​രാജിലേക്ക്​ പോകുന്ന ട്രെയിനിൽ തിരക്ക്​ കാരണം കയറാൻ സാധിക്കാത്തതിനെ തുടർന്ന്​ കല്ല്​ കൊണ്ട്​ ആക്രമിച്ച്​ ഭക്​തർ. ബിഹാറിലെ മധുബനി റെയിൽവേ സ്​റ്റേഷനിൽ സ്വതന്ത്ര സേനാനി എക്സ്​പ്രസിന്​ നേരെയാണ്​ ആക്രമണമുണ്ടായത്​. സംഭവത്തിന്‍റെ ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പ്രചരിക്കുന്നുണ്ട്​. പ്രകോപിതരായ യാത്രക്കാർ ട്രെയിനിന്​ നേരെ കല്ല്​ കൊണ്ട്​ എറിയുന്നതും​ എസി കോച്ചിന്‍റെ ചില്ല്​ തകർക്കുന്നതും​ ബലംപ്രയോഗിച്ച്​ അകത്തേക്ക്​ കയറുന്നതും വിഡിയോയിൽ കാണാം.

എസി കോച്ചുകൾ കുംഭമേളക്ക്​ പോകുന്ന ഭക്തരെക്കൊണ്ട് നിറഞ്ഞിരുന്നതിനാൽ വാതിലുകൾ തുറക്കാൻ കഴിഞ്ഞിരുന്നില്ലെന്ന് ദൃക്‌സാക്ഷികൾ പറഞ്ഞു. സ്റ്റേഷനിൽ തിരക്ക് വർധിച്ചതോടെ ചില യാത്രക്കാർ ജനാലയിലൂടെ കയറാൻ ശ്രമിച്ചു. മറ്റു ചിലർ പ്രകോപിതരായി കല്ലെറിയുകയും ഗ്ലാസ് തകർക്കുകയും ചെയ്തു.

മധുബനിക്കും ദർഭംഗയ്ക്കും ഇടയിലും ട്രെയിനിന്​ നേരെ ആക്രമണമുണ്ടായി. M1 മുതൽ B5, A1 വരെയുള്ള കോച്ചുകളുടെ ജനാലകൾക്ക് കേടുപാടുകൾ സംഭവിച്ചു. സമസ്തിപൂർ സ്റ്റേഷനിൽ സ്ഥിതി കൂടുതൽ വഷളായി. വലിയ ജനക്കൂട്ടം ജനാലകളിലൂടെ എസി കോച്ചുകളിലേക്ക് കയറിയതോടെ കമ്പാർട്ടുമെന്റുകൾ ജനറൽ കോച്ചുകൾക്ക്​ തുല്യമായി മാറി.

മാഘപൂർണിമയ്ക്കായി മിഥിലാഞ്ചൽ മേഖലയിൽനിന്ന് ആയിരങ്ങളാണ്​ പ്രയാഗ്‌രാജിലേക്ക് പോകുന്നത്​. എന്നാൽ, വലിയ തിരക്ക് ക്രമസമാധാനനില തകർത്തു. പരിക്കേറ്റ യാത്രക്കാരെ ചികിത്സിക്കാൻ വന്ന മെഡിക്കൽ സംഘങ്ങൾക്ക് ജനക്കൂട്ടത്തിനിടയിലൂടെ സഞ്ചരിക്കാൻ കഴിയാത്ത സ്ഥിതിയായിരുന്നു. സ്ഥിതിഗതികൾ നിയന്ത്രിക്കാൻ റെയിൽവേ പൊലീസും പാടുപെട്ടു. ട്രെയിൻ സമസ്തിപൂരിൽനിന്ന് ഒരു മണിക്കൂർ വൈകിയാണ് പുറപ്പെട്ടത്. ചൊവ്വാഴ്ച ബിഹാറിലെ സിവാനിൽ ലാച്ച്​വി എക്സ്​പ്രസിന്​ നേരെയും ആക്രമണമുണ്ടായി.