ന്യൂഡൽഹി: 2020 ഫെബ്രുവരിയിലെ ഡൽഹി കലാപ ഗൂഢാലോചനയുമായി ബന്ധപ്പെട്ട കേസിൽ മുൻ ജെഎൻയു വിദ്യാർഥി നേതാവ് ഉമർ ഖാലിദ്, ഷർജീൽ ഇമാം എന്നിവരുടെ ജാമ്യാപേക്ഷകൾ ഡൽഹി ഹൈക്കോടതി തള്ളി.
ജസ്റ്റിസ് പ്രതിഭ എം. സിങ്, ജസ്റ്റിസ് ദിനേഷ് ഭട്ട് എന്നിവരടങ്ങിയ ഡിവിഷൻ ബെഞ്ചാണ് ഉത്തരവിട്ടത്.
ഗുൽഫിഷ ഫാത്തിമ കേസിൽ സുപ്രിംകോടതി നിർദേശിച്ച ജാമ്യവ്യവസ്ഥകളിൽ ഭേദഗതി വരുത്താൻ ഹൈക്കോടതിക്ക് അധികാരമില്ലെന്ന് ബെഞ്ച് വ്യക്തമാക്കി. സംരക്ഷിത സാക്ഷികളുടെ വിസ്താരം പൂർത്തിയാകുക അല്ലെങ്കിൽ സുപ്രിംകോടതി ഉത്തരവ് പുറപ്പെടുവിച്ച തീയതി മുതൽ (2026 ജനുവരി 05) ഒരു വർഷം തികയുക — ഇവയിൽ ഏതാണോ ആദ്യം സംഭവിക്കുന്നത് അതുവരെ കാത്തിരിക്കണമെന്നായിരുന്നു സുപ്രിംകോടതി വ്യവസ്ഥ. ജുഡീഷ്യൽ അച്ചടക്കം പാലിക്കാൻ ഹൈക്കോടതി ബാധ്യസ്ഥമാണെന്ന് ചൂണ്ടിക്കാട്ടിയാണ് ജാമ്യാപേക്ഷ നിരസിച്ചത്.
ഡല്ഹി കലാപവുമായി ബന്ധപ്പെട്ട ഗൂഢാലോചനയില് പങ്കുണ്ടെന്ന് ആരോപിച്ചാണ് 2020 സെപ്റ്റംബറില് ഉമര് ഖാലിദിനെ ഡല്ഹി പൊലീസ് അറസ്റ്റ് ചെയ്തത്. ക്രിമിനല് ഗൂഢാലോചന, കലാപം, നിയമ വിരുദ്ധമായി സംഘം ചേരല്, യുഎപിഎ തുടങ്ങിയ വകുപ്പുകള് ചുമത്തിയായിരുന്നു അറസ്റ്റ്. വിചാരണ തടവുകാരനായി ജയിലില് തുടരുന്ന ഉമര് ഖാലിദിന്റെ ജാമ്യാപേക്ഷ നേരത്തെ പലതവണ കീഴ്ക്കോടതികളും ഹൈക്കോടതിയും തള്ളിയിരുന്നു.