ട്രെയിൻ യാത്രക്കിടെ ഇനി ചൂടുവെള്ളത്തിൽ കുളിക്കാം; ഏതൊക്കെ ട്രെയിനിൽ ഈ സൗകര്യം ലഭിക്കും

കോഴിക്കോട്: ദീർഘദൂര യാത്രികരെല്ലാം ഒരിക്കലെങ്കിലും ആഗ്രഹിച്ചിട്ടുണ്ടാവും ട്രെയിനിൽ കുളിക്കാൻ സൗകര്യം ഉണ്ടായിരുന്നെങ്കിലെന്ന്. വൃത്തിയില്ലാത്ത ബാത്ത് റൂമിൽ പോയി കുളിക്കുന്ന കാര്യം ആലോചിച്ചാൽ ആഗ്രഹം ഒഴിവാക്കലാണ് പതിവ്. എന്നാൽ, ഇനി മുതൽ ട്രെയിനിൽ കുളിക്കാൻ ചൂടുവെള്ളം കിട്ടും എന്ന അറിയിപ്പാണ് റെയിൽവേയിൽ നിന്ന് വന്നിരിക്കുന്നത്. ആദ്യ ഘട്ടത്തിൽ ഏതൊക്കെ ട്രെയിനുകളിലാണ് ഈ സൗകര്യം ലഭിക്കുക എന്നതും റെയിൽവേ വ്യക്തമാക്കിയിട്ടുണ്ട്.

നിലവിൽ പ്രീമിയം ട്രെയിനുകളായ രാജധാനി, തുരന്തോ പോലുള്ളവയുടെ ഫസ്റ്റ് എസി കോച്ചുകളിൽ ചൂടുവെള്ളം ലഭിക്കും. എന്നാൽ, ഉയർന്ന ടിക്കറ്റ് ചാർജ് മൂലം സാധാരണക്കാർക്ക് ഇവ അപ്രാപ്യമാണ്. അടുത്ത ഘട്ടത്തിൽ വന്ദേഭാരത് സ്ലീപ്പർ ട്രെയിനുകളിലായിരിക്കും കുളിക്കാൻ ചൂടുവെള്ളം ലഭിച്ചു തുടങ്ങുക. മഞ്ഞുകാല യാത്രികർക്ക് ഏറെ ഉപകാരപ്രദമായിരിക്കും കുളിക്കാൻ ചൂടുവെള്ളം കിട്ടുന്ന സംവിധാനം. വന്ദേഭാരത് സ്ലീപ്പർ ട്രെയിനുകളുടെ ഫസ്റ്റ് ക്ലാസ് യാത്രികർക്ക് പ്രത്യേകം പണം നൽകാതെ തന്നെ ഈ സൗകര്യം ഉപയോഗിക്കാൻ സാധിക്കും. ഫസ്റ്റ് ക്ലാസ് ടിക്കറ്റ് നിരക്കിൽ ഉൾപ്പെടുന്നതാണ് ഈ സൗകര്യം.

ഫസ്റ്റ് ക്ലാസ് ടിക്കറ്റ് എടുക്കാത്ത യാത്രികർക്ക് ഈ സൗകര്യം എങ്ങനെ ലഭിക്കും എന്നത് സംബന്ധിച്ചുള്ള ഔദ്യോഗിക അറിയിപ്പ് റെയിൽവേയിൽ നിന്ന് ലഭിച്ചിട്ടില്ല.ഡൽഹി-കാശ്മീർ ട്രെയിനിൽ ആയിരിക്കും ചൂടുവെള്ളത്തിൽ കുളിക്കാനുള്ള സൗകര്യം ആദ്യഘട്ടത്തിൽ ഉണ്ടാവുകയെന്നെന്നാണ് അറിയിപ്പ്. വേഗയാത്ര കൊണ്ട് പ്രസിദ്ധമായ വന്ദേഭാരത് ട്രെയിനുകളെ കൂടുടതൽ ജനകീയമാക്കുന്നതിന്റെ ഭാഗമായിട്ടാണ് കുളിക്കാൻ ചൂടുവെള്ളം പോലുള്ള സൗകര്യങ്ങൾ നൽകുന്നത്.