കോഴിക്കോട്: പിഎം ശ്രീ പദ്ധതിയിൽ ഒപ്പിട്ടതുമായി ബന്ധപ്പെട്ട ചർച്ചക്കിടെ താലിബാനി പരാമർശവുമായി സിപിഎം പ്രതിനിധി. പാർട്ടി നേതാക്കളെ അപമാനിക്കുന്നത് താലിബാനികളുടെ സ്ഥിരം തൊഴിലാണ് എന്നായിരുന്നു മീഡിയവൺ 'സ്പെഷ്യൽ എഡിഷൻ' ചർച്ചയിൽ സിപിഎം സംസ്ഥാന കമ്മിറ്റി അംഗമായ കെ.അനിൽകുമാറിന്റെ പരാമർശം. പിഎം ശ്രീയിൽ ഒപ്പിട്ടത് സിപിഎം ജനറൽ സെക്രട്ടറി എം.എ ബേബി പോലും അറിഞ്ഞിട്ടില്ല എന്ന അവതാരകന്റെ പരാമർശമാണ് അനിൽകുമാറിനെ പ്രകോപിപ്പിച്ചത്.
താലിബാൻ ചാപ്പയൊക്കെ എകെജി സെന്ററിൽ വെച്ചാൽ മതിയെന്നായിരുന്നു അവതാരകനായ അജിംസിന്റെ മറുപടി. താലിബാൻ വിദേശകാര്യ മന്ത്രിയുമായി ചർച്ച നടത്തിയ മോദിയെയോ എസ്.ജയശങ്കറിനെയോ താലിബാനിയെന്ന് വിളിക്കുമോയെന്ന ചോദ്യത്തിന് നിങ്ങൾ താലിബാനെ തള്ളിപ്പറയുമോ എന്നായിരുന്നു അനിൽകുമാറിന്റെ ചോദ്യം. താലിബാൻ പരാമർശം പിൻവലിക്കാൻ അദ്ദേഹം തയ്യാറായില്ല.