തിരുവനന്തപുരം: തിരുവനന്തപുരം അരുവിക്കര മണ്ഡലത്തിലെ യുഡിഎഫ് സ്ഥാനാർഥി വി.എസ് ശിവകുമാർ, ഡിവൈഎഫ്ഐ നേതാവ് എ.എ റഹീമിനെതിരെ തെരഞ്ഞെടുപ്പ് കമ്മീഷന് പരാതി നൽകി. അരുവിക്കരയിലും തിരുവനന്തപുരത്തും ബിജെപിയും കോൺഗ്രസും തമ്മിൽ വോട്ട് കച്ചവടത്തിനായി രഹസ്യ ധാരണയുണ്ടാക്കി എന്ന റഹീമിന്റെ ആരോപണത്തിനെതിരെയാണ് പരാതി നൽകിയത്. തെരഞ്ഞെടുപ്പ് ചട്ടങ്ങളുടെ ലംഘനമാണ് റഹീം നടത്തിയതെന്ന് പരാതിയിൽ ചൂണ്ടിക്കാട്ടുന്നു.
ആരോപണം ഉന്നയിച്ച എ.എ റഹീമിന് പുറമെ സിപിഎം ജില്ലാ സെക്രട്ടറിക്കെതിരെയും ശക്തമായ നിയമനടപടികളുമായി മുന്നോട്ട് പോകാനാണ് ശിവകുമാറിന്റെ തീരുമാനം. അടിസ്ഥാനരഹിതമായ ആരോപണങ്ങൾ ഉന്നയിച്ച് തന്റെ വ്യക്തിത്വത്തെയും രാഷ്ട്രീയ പ്രതിച്ഛായയെയും മോശമാക്കാൻ ശ്രമിച്ചു എന്നാരോപിച്ച് ജില്ലാ സെക്രട്ടറിക്കെതിരെ രണ്ട് കോടി രൂപയുടെ മാനനഷ്ടക്കേസ് ഫയൽ ചെയ്യുമെന്ന് അദ്ദേഹം വാർത്താസമ്മേളനത്തിൽ അറിയിച്ചു.
തിരുവനന്തപുരം, അരുവിക്കര മണ്ഡലങ്ങളിൽ കോൺഗ്രസ് സ്ഥാനാർഥികളെ വിജയിപ്പിക്കാൻ ബിജെപിയുമായി 'ഡീൽ' ഉറപ്പിച്ചു എന്നായിരുന്നു എ.എ റഹീമിന്റെ പ്രധാന ആരോപണം. വോട്ടർമാരെ സ്വാധീനിക്കാൻ വർഗീയ ശക്തികളുമായി കോൺഗ്രസ് കൈകോർക്കുന്നു എന്ന തരത്തിലുള്ള പ്രചാരണം ഇടത് മുന്നണി ശക്തമാക്കിയ സാഹചര്യത്തിലാണ് യുഡിഎഫ് ക്യാമ്പ് നിയമപരമായ പ്രതിരോധത്തിലേക്ക് നീങ്ങിയത്.
തോൽവി ഭയന്നാണ് സിപിഎം ഇത്തരം വ്യാജ ആരോപണങ്ങൾ ഉന്നയിക്കുന്നതെന്ന് വി.എസ് ശിവകുമാർ പ്രതികരിച്ചു. വികസന ചർച്ചകളിൽ നിന്ന് വോട്ടർമാരുടെ ശ്രദ്ധ തിരിക്കാനാണ് ഇടത് നേതാക്കൾ ശ്രമിക്കുന്നതെന്നും, ജനമധ്യത്തിൽ തനിക്കുള്ള പിന്തുണ ഇല്ലാതാക്കാൻ ഇത്തരം തരംതാഴ്ന്ന രാഷ്ട്രീയ പ്രചാരണങ്ങൾ സഹായിക്കില്ലെന്നും അദ്ദേഹം കൂട്ടിച്ചേർത്തു.