ഫിഫ ലോകകപ്പ് ചരിത്രത്തിൽ ഏറ്റവും കൂടുതൽ ക്ലീൻ ഷീറ്റുകൾ സ്വന്തമാക്കിയ ഇതിഹാസ ഗോൾകീപ്പർമാരുടെ പട്ടികയിൽ ബെൽജിയത്തിന്റെ റയൽ മാഡ്രിഡ് താരം തിബോ കോർട്ടുവയും. 2026 ലോകകപ്പിൽ ഒരു ക്ലീൻ ഷീറ്റ് കൂടി സ്വന്തമാക്കിയാണ് ലോകകപ്പ് ചരിത്രത്തിലെ എക്കാലത്തെയും മികച്ച ഗോൾകീപ്പർമാരുടെ പട്ടികയിൽ അദ്ദേഹം ഇടം പിടിച്ചത്. യാൻ യോംഗ്ബ്ലൂഡ്, ലെയോ എന്നിവരോടൊപ്പം എട്ട് ക്ലീൻ ഷീറ്റുമായി മൂന്നാം സ്ഥാനം പങ്കിടുകയാണ് കോർട്ടുവ. ഇവർക്ക് പുറമെ മൂന്ന് പേർ കൂടി എട്ട് ക്ലീൻ ഷീറ്റുകൾ പങ്കിടുന്നുണ്ട്. 2014, 2018, 2022, 2026 എന്നീ നാല് ലോകകപ്പുകളിലായി 18 മത്സരങ്ങൾ കളിച്ച കോർട്ടുവ വെറും 13 ഗോളുകൾ മാത്രമാണ് വഴങ്ങിയത്.
ഒന്നാം സ്ഥാനത്ത് ബാർത്തെസും ഷിൽട്ടണും
ഫ്രാൻസിന്റെ ഫാബിയൻ ബാർത്തെസും ഇംഗ്ലണ്ടിന്റെ പീറ്റർ ഷിൽട്ടണുമാണ് പട്ടികയിൽ ഒന്നാം സ്ഥാനം പങ്കിടുന്നത്. ഇരുവരും 17 മത്സരങ്ങളിൽ നിന്ന് 10 ക്ലീൻ ഷീറ്റുകൾ വീതം നേടിയിട്ടുണ്ട്. 1998ൽ ഫ്രാൻസിനെ ലോകകപ്പ് കിരീടത്തിലേക്ക് നയിക്കുന്നതിൽ നിർണായക പങ്ക് വഹിച്ച ബാർത്തെസ്, ആ ടൂർണമെന്റിൽ മാത്രം അഞ്ച് ക്ലീൻ ഷീറ്റുകൾ സ്വന്തമാക്കിയിരുന്നു. തുടർന്ന് 2002ൽ ഒന്നും 2006ൽ നാലും ക്ലീൻ ഷീറ്റുകൾ കൂടി നേടിയ അദ്ദേഹം തന്റെ ലോകകപ്പ് കരിയറിൽ 17 മത്സരങ്ങളിൽ നിന്നായി വഴങ്ങിയത് എട്ട് ഗോളുകൾ മാത്രമാണ് (ഓരോ മത്സരത്തിലും ശരാശരി 0.47 ഗോളുകൾ). 59 ശതമാനമാണ് ബാർത്തെസിന്റെ ക്ലീൻ ഷീറ്റ് നിരക്ക്. ഇംഗ്ലണ്ടിന്റെ ഇതിഹാസ താരമായ പീറ്റർ ഷിൽട്ടൺ 1982ൽ നാലും, 1986, 1990 ലോകകപ്പുകളിൽ മൂന്ന് വീതവും ക്ലീൻ ഷീറ്റുകൾ നേടിയാണ് ബാർത്തെസിന്റെ റെക്കോർഡിനൊപ്പമെത്തിയത്. 17 മത്സരങ്ങളിൽ നിന്ന് 10 ഗോളുകൾ മാത്രമാണ് അദ്ദേഹം വഴങ്ങിയത്.
പട്ടികയിൽ ലോറിസും ന്യൂയറും
നെതർലൻഡ്സിന്റെ മുൻ ഗോൾകീപ്പർ യാൻ യോംഗ്ബ്ലൂഡ് 12 മത്സരങ്ങളിൽ നിന്ന് എട്ട് ക്ലീൻ ഷീറ്റുകൾ നേടി പട്ടികയിൽ മൂന്നാം സ്ഥാനത്തുണ്ട്. ഓരോ മത്സരത്തിലും ശരാശരി 0.67 ക്ലീൻ ഷീറ്റുകൾ എന്ന കണക്കിൽ ഈ പട്ടികയിലെ ഏറ്റവും മികച്ച അനുപാതം അദ്ദേഹത്തിനാണ്. ബ്രസീലിന്റെ ലെയോ 14 ലോകകപ്പ് മത്സരങ്ങളിൽ നിന്ന് എട്ട് ക്ലീൻ ഷീറ്റുകൾ സ്വന്തമാക്കിയിട്ടുണ്ട് (വഴങ്ങിയത് 7 ഗോളുകൾ മാത്രം). കോർട്ടുവക്ക് പിന്നാലെ ജർമനിയുടെ സെപ് മയർ, ബ്രസീലിന്റെ ടഫറേൽ, ഫ്രാൻസിന്റെ ഹ്യൂഗോ ലോറിസ് എന്നിവരും എട്ട് ക്ലീൻ ഷീറ്റുകളുമായി പട്ടികയിലുണ്ട്. ഏഴ് ക്ലീൻ ഷീറ്റുകളുമായി ബ്രസീലിന്റെ അലിസൺ ബക്കർ, ഗിൽമാർ, സ്പെയിനിന്റെ ഇക്കർ കാസിയാസ്, ഉറുഗ്വെയുടെ ഫെർണാണ്ടോ മുസ്ലെറ, ജർമനിയുടെ മാനുവൽ ന്യൂയർ എന്നിവരാണ് പട്ടികയിൽ തൊട്ടുപിന്നിലുള്ളവർ.
ഫിഫ ലോകകപ്പിൽ ഏറ്റവും കൂടുതൽ ക്ലീൻ ഷീറ്റുകൾ നേടിയ ഗോൾകീപ്പർമാർ