പട്ടിണി ആയുധമാക്കുന്ന ഇസ്രായേൽ നടപടി യുദ്ധകുറ്റമെന്ന്​ മുന്നറിയിപ്പ് നൽകി യുഎൻ

​ഗസ്സ സിറ്റി: പട്ടിണി ആയുധമാക്കുന്ന ഇസ്രായേൽ നടപടി യുദ്ധകുറ്റമെന്ന്​ മുന്നറിയിപ്പ് നൽകി യുഎൻ. ഗസ്സയിൽ ഇസ്രായേൽ നടത്തിയ വ്യോമാക്രമണത്തിൽ രണ്ട്​ ഫലസ്​തീനികൾ കൊല്ലപ്പെടുകയും നിരവധി പേർക്ക്​ പരിക്കേൽക്കുകയും ചെയ്തു. ഇസ്രായേൽ ഏർപ്പെടുത്തിയ ഉപരോധം ലംഘിക്കാൻ അറബ്​ രാജ്യങ്ങൾ തയാറാകണമെന്ന്​ ഹമാസ് ആവശ്യപ്പെട്ടു​.

ഗസ്സയിൽ പട്ടിണി ആയുധമാക്കുന്ന ഇസ്രായേൽ നടപടി യുദ്ധകുറ്റമെന്ന്​ യുഎൻ മനുഷ്യാവകാശ ഓഫീസ്​ മുന്നറിയിപ്പ് നൽകി. ഭക്ഷണം, വെള്ളം, താമസം, ചികിൽസ എന്നിവ തടയുന്നത്​ അന്താരാഷ്ട്ര ചട്ടങ്ങളുടെ നഗ്നമായ ലംഘനമാണ്​. വെടിനിർത്തൽ കരാർ നിലവിൽ വന്ന ജനുവരി 19ന്​ ശേഷം ഗസ്സയിൽ ഇസ്രായേൽ നടത്തിയ ആക്രമണങ്ങളിൽ 58 ഫലസ്തീനികൾ കൊല്ലപ്പെട്ടതായും ​ പ്രസ്താവനയിൽ അറിയിച്ചു.

ഒരാഴ്​ചയായി ഇസ്രായേൽ അടിച്ചേൽപിച്ച സമ്പൂർണ ഉപരോധം ഗസ്സയിലെ മുഴുവൻ ജനതയെയും പ്രതികൂലമായി ബാധിക്കുന്നതായി വിവിധ യുഎൻ ഏജൻസികളും ചൂണ്ടിക്കാട്ടി. ഇസ്രായേലിന്‍റെ ഉപരോധം മറികടന്ന്​ ഗസ്സയിൽ സഹായ വസ്തുക്കൾ എത്തിക്കാൻ അറബ്​ ലോകം ശക്തമായ നടപടി സ്വീകരിക്കണമെന്ന്​ ഹമാസ്​ ആവശ്യപ്പെട്ടു.

ഗസ്സയിലെ ശുജാഇയയിൽ ഇസ്രായേൽ നടത്തിയ വ്യോമാ​ക്രമണത്തിൽ രണ്ട്​ ഫലസ്തീൻകാർ കൊല്ലപ്പെടുകയും നിരവധി പേർക്ക്​ പരിക്കേൽക്കുകയും ചെയ്തു. വെസ്റ്റ്​ ബാങ്കിലെ വിവിധ പ്രദേശങ്ങളിലും ഇസ്രായൽ അതിക്രമം തുടർന്നു. നബുലസിലെ അൽനാസർ പള്ളിക്ക് നേരെയും ആക്രമണമുണ്ടായി. അറബ്​ രാജ്യങ്ങൾ രൂപപ്പെടുത്തിയ ഗസ്സ പുനർനിർമാണ പദ്ധതിക്ക്​ കൂടുതൽ രാജ്യങ്ങൾ പിന്തുണ പ്രഖ്യാപിച്ചു. ചൈന, റഷ്യ എന്നിവയ്ക്ക് പുറമെ വിവിധ യൂറോപ്യൻ രാജ്യങ്ങളും പദ്ധതിയോട്​ അനുകൂല നിലപാട്​ അറിയിച്ചു.