സൗദി ഗതാഗത വകുപ്പില് സമ്പൂര്ണ സ്വദേശിവത്കരണം നടപ്പാക്കും
വനിതാ ടാക്സി സ്വദേശി വനിതകള്ക്ക് മാത്രമായി നീക്കി വെക്കും
സൗദി ഗതാഗത വകുപ്പില് സമ്പൂര്ണ സ്വദേശിവത്കരണം നടപ്പാക്കുമെന്ന് ഗതാഗത അതോറിറ്റി. വനിതാ ടാക്സി സ്വദേശി വനിതകള്ക്ക് മാത്രമായി നീക്കി വെക്കും. റെന്റ്-എ-കാര് മേഖലയിലെ സ്വദേശിവത്കരണം 45 ദിവസത്തിനകം പൂര്ത്തിയാകുമെന്നും അതോറിറ്റി അറിയിച്ചു.
ഗതാഗത മേഖലയില് സമ്പൂര്ണ സ്വദേശിവത്കരണം നടപ്പാക്കാന് ഉദ്ദേശിക്കുന്നതായി ഗതാഗത അതോറിറ്റി മേധാവിയും സൗദി റെയില്വെ പ്രസിഡന്റുമായ ഡോ. റുമൈഹ് അല്റുമൈഹ് പറഞ്ഞു. സ്വദേശിവത്കരണത്തിന്റെ ഭാഗമായി തുടക്കം കുറിച്ച റെന്റ്-എ-കാര് മേഖലയില് 45 ദിവസത്തിനകം പൂര്ണമായും സ്വദേശികളായിരിക്കുമെന്നും അദ്ദേഹം പറഞ്ഞു. പ്രാദേശിക പത്രത്തിന് നല്കിയ അഭിമുഖത്തിലാണ് അല്റുമൈഹ് ഇക്കാര്യം വ്യക്തമാക്കിയത്. വനിതകള്ക്ക് ഡ്രൈവിങ് അനുവദിക്കുന്നതിന്റെ ഭാഗമായി രാജ്യത്ത് വനിത ടാക്സിയും നിലവില് വരും. എന്നാല് ഈ ജോലിക്ക് വിദേശി വനിതകളെ റിക്രൂട്ട്ചെയ്യുമെന്ന വാര്ത്ത അതോറിറ്റി മേധാവി നിഷേധിച്ചു. സ്വദേശി വനിതകള് ഈ ജോലിക്ക് തയ്യാറാണെന്നിരിക്കെ വിദേശ റിക്രൂട്ടിങിനെ അവലംബിക്കില്ലെന്നും പൂര്ണമായും സ്വദേശി വനിതകള്ക്ക് സംവരണം ഏര്പ്പെടുത്തുമെന്നും അദ്ദേഹം കൂട്ടിച്ചേര്ത്തു. അന്താരാഷ്ട്ര നിലവാരമുള്ള ഓണ്ലൈന് ആപ് വഴിയുള്ള ടാക്സി സര്വീസില് സ്വദേശികള് കഴിവുതെളിയിച്ചിട്ടുണ്ട്. റെന്റ്-എ-കാര് മേഖലയില് നിരവധി പ്രശ്നങ്ങള് നിലനില്ക്കുന്നുണ്ട്. ഈ പ്രശ്നങ്ങള്ക്കെല്ലാം മാര്ച്ച് 18ഓടെ പരിഹാരിക്കുമെന്നും അല്റുമൈഹ് പ്രത്യാശ പ്രകടിപ്പിച്ചു.