ഫർവാനിയയിൽ നൂറിലധികം വ്യാജ ആഡംബര വസ്തുക്കൾ പിടികൂടി

കുവൈത്ത് സിറ്റി: ഫർവാനിയ ഗവർണറേറ്റിൽ നടത്തിയ പരിശോധനകളിൽ വാണിജ്യ വ്യവസായ മന്ത്രാലയത്തിലെ വാണിജ്യ നിയന്ത്രണ വകുപ്പ് 381 വ്യാജ ഉൽപ്പന്നങ്ങൾ പിടിച്ചെടുത്തു. പിടിച്ചെടുത്ത വസ്തുക്കളിൽ പ്രശസ്ത അന്താരാഷ്ട്ര ബ്രാൻഡുകളെ അനുകരിക്കുന്ന വ്യാജ വാച്ചുകൾ, വാലറ്റുകൾ, സ്ത്രീകളുടെ ഹാൻഡ്‌ബാഗുകൾ, തൊപ്പികൾ എന്നിവ ഉൾപ്പെടുന്നു. നിയമലംഘകരെ പിടികൂടുന്നതിനും കർശനമായ നടപടികൾ കൈക്കൊള്ളുന്നതിനുമുള്ള മന്ത്രാലയത്തിന്റെ തുടർച്ചയായ ശ്രമങ്ങളുടെ ഭാഗമായാണ് ഈ പിടിച്ചെടുക്കലെന്ന് മന്ത്രാലയത്തിലെ വാണിജ്യ നിയന്ത്രണ വകുപ്പ് ഡയറക്ടർ ഫൈസൽ അൽ അൻസാരി പറഞ്ഞു. പരിശോധനാ സംഘങ്ങൾ 24 മണിക്കൂറും പ്രവർത്തിക്കുന്നതായും അദ്ദേഹം കൂട്ടിച്ചേർത്തു.

എല്ലാതരം വാണിജ്യ നിയമലംഘനങ്ങളും നിരീക്ഷിക്കുന്നതിനായി മന്ത്രാലയം ഫീൽഡ് കാമ്പയിനുകൾ തുടരുന്നുണ്ട്. ന്യായമായ വിലനിർണയം ഉറപ്പാക്കുക, കൃത്രിമ വിലവർധനവ് തടയുക, ഉൽപന്ന ഗുണനിലവാരം പരിശോധിക്കുക, ഉൽപന്നത്തിന്റെ ഉത്ഭവ രാജ്യം സ്ഥിരീകരിക്കുക, വാണിജ്യ പ്രവർത്തനങ്ങളെ നിയന്ത്രിക്കുന്ന എല്ലാ ബാധകമായ നിയമങ്ങളും നടപ്പിലാക്കുക എന്നിവ ഇതിൽ ഉൾപ്പെടുന്നു. ഉപഭോക്താക്കളെ സംരക്ഷിക്കുന്നതിനും കുവൈത്ത് നിയമങ്ങൾക്കും മാനദണ്ഡങ്ങൾക്കും അനുസൃതമായി വിപണി പ്രവർത്തിക്കുന്നുണ്ടെന്ന് ഉറപ്പാക്കുന്നതിനുമുള്ള മന്ത്രാലയത്തിന്റെ പ്രതിബദ്ധത അൽ അൻസാരി ചൂണ്ടിക്കാട്ടി.