കത്തോലിക്കാ ബാവയുടെ ഒമാൻ സന്ദർശനത്തിന് വ്യാഴാഴ്ച തുടക്കമാകും
മസ്കറ്റ് മാർ ഗ്രീഗോറിയോസ് ഓർത്തഡോക്സ് മഹാ ഇടവകയിലെ ഈ വർഷത്തെ വിശുദ്ധവാര ശുശ്രൂഷകൾക്ക് മുഖ്യകാർമ്മികത്വം വഹിക്കുന്നതിനാണ് ബാവയെത്തുന്നത്
Update: 2022-04-05 17:17 GMT
മലങ്കര ഓർത്തഡോക്സ് സുറിയാനി സഭയുടെ പരമാധ്യക്ഷൻ ബസേലിയോസ് മാർത്തോമ്മാ മാത്യൂസ് തൃതീയൻ കാതോലിക്കാ ബാവായുടെ ഒമാൻ സന്ദർശനത്തിന് വ്യാഴാഴ്ച മുതൽ തുടക്കമാകും. മസ്കറ്റ് മാർ ഗ്രീഗോറിയോസ് ഓർത്തഡോക്സ് മഹാ ഇടവകയിലെ ഈ വർഷത്തെ വിശുദ്ധവാര ശുശ്രൂഷകൾക്ക് മുഖ്യകാർമ്മികത്വം വഹിക്കുന്നതിനാണ് അദ്ദേഹം എത്തുന്നത്.
സഭയുടെ പ്രധാന മേലധ്യക്ഷനായി സ്ഥാനാരോഹണം ചെയ്തശേഷമുള്ള പ്രഥമ സന്ദർശനത്തിൽ ഇടവക ഒരുക്കുന്ന വിവിധ പരിപാടികളിലും പങ്കെടുക്കും. വിശ്വാസി സമൂഹം പള്ളിയങ്കണത്തിൽ പരമ്പരാഗത സ്വീകരണവും ഒരുക്കിയിട്ടുണ്ട്.
ഏപ്രിൽ 17ന് ഇടവകയുടെ ആഭിമുഖ്യത്തിൽ വലിയ സ്വീകരണമാണൊരുക്കിയിരിക്കുന്നത്. റുവി സെന്റ് തോമസ് ചർച്ചിൽ നടക്കുന്ന സ്വീകരണ സമ്മേളനത്തിൽ വിവിധ സഭാ പ്രതിനിധികളൂം പ്രമുഖ വ്യക്തിത്വങ്ങളും പങ്കെടുക്കും. 18ന് ഒമാനിലെ മറ്റൊരു ഇടവകയായ ഗാലാ സെന്റ് മേരീസ് ഓർത്തഡോക്സ് ദേവാലയത്തിന്റെ ആഭിമുഖ്യത്തിലും സ്വീകരണ പരിപാടികൾ ഒരുക്കിയിട്ടുണ്ട്. സന്ദർശം പൂർത്തിയാക്കി കാതോലിക്കാ ബാവ ഈ മാസം ഇരുപതാം തീയതിയോടെ മടങ്ങും.