ഓരോ പുതുവർഷാരംഭത്തിലും ഗൂഗിളിൽ ഏറ്റവും കൂടുതൽ തിരയപ്പെടുന്ന വാക്കുകളാണ് 'ഡയറ്റ്', 'ശരീരഭാരം കുറയ്ക്കുന്നതെങ്ങനെ' തുടങ്ങിയവ. ജിമ്മുകളിൽ തിരക്ക് കൂടുന്നതും സോഷ്യൽ മീഡിയയിൽ പുതിയ ഭക്ഷണരീതികൾ വ്യാപകമായി പ്രചരിക്കുന്നതും ഈ സമയത്താണ്. എന്നാൽ പെട്ടെന്ന് തടി കുറയ്ക്കാൻ നോക്കുന്ന പലർക്കും അത് ദീർഘകാലം നിലനിർത്താൻ കഴിയാറില്ലെന്നാണ് പഠനങ്ങൾ വ്യക്തമാക്കുന്നത്.
ശരീരഭാരത്തിൽ മാത്രം ശ്രദ്ധ കേന്ദ്രീകരിക്കുന്നത് ആരോഗ്യത്തിന് ഗുണകരമായ മറ്റ് പല മാറ്റങ്ങളെയും അവഗണിക്കാൻ കാരണമാകുന്നു. ഭാരം കുറഞ്ഞാലും ഇല്ലെങ്കിലും ആരോഗ്യത്തിന് വലിയ നേട്ടങ്ങൾ നൽകുന്ന അഞ്ച് മാർഗങ്ങൾ നമുക്ക് നോക്കാം.
സസ്യാഹാരങ്ങൾ ഭക്ഷണത്തിൽ കൂടുതൽ ഉൾപ്പെടുത്തുക എന്നതാണ് ഒന്നാമത്തെ വഴി. ഇതിനർഥം പൂർണമായും ഒരു സസ്യാഹാരി ആകണമെന്നല്ല. മാംസാഹാരം കഴിക്കുന്നവരാണെങ്കിൽ പോലും ഭക്ഷണത്തിൽ പഴങ്ങൾ, പച്ചക്കറികൾ, ധാന്യങ്ങൾ, അണ്ടിപ്പരിപ്പുകൾ എന്നിവയുടെ അളവ് വർധിപ്പിക്കുന്നത് ഹൃദ്രോഗം, പ്രമേഹം, അർബുദം തുടങ്ങിയ രോഗങ്ങളുടെ സാധ്യത കുറയ്ക്കുമെന്ന് പഠനങ്ങൾ തെളിയിക്കുന്നു. പ്രതിദിന ഭക്ഷണക്രമത്തിൽ 200ഗ്രാമെങ്കിലും പഴങ്ങളും പച്ചക്കറികളും ഉൾപ്പെടുത്തുന്നത് അകാല മരണം ഒഴിവാക്കാൻ സഹായിക്കും.
വ്യായാമം എന്നത് ആരോഗ്യത്തിന് നൽകാവുന്ന ഏറ്റവും മികച്ച മരുന്നാണ്. പലരും വ്യായാമത്തെ ശരീരഭാരം കുറയ്ക്കാനുള്ള ഒരു ഉപാധിയായി മാത്രമാണ് കാണുന്നത്. എന്നാൽ ഭാരം കുറഞ്ഞില്ലെങ്കിൽ പോലും കൃത്യമായ വ്യായാമം ശരീരത്തിലെ ചീത്ത കൊളസ്ട്രോൾ കുറയ്ക്കാനും ഹൃദയാരോഗ്യം മെച്ചപ്പെടുത്താനും ഉറക്കവും മാനസികാവസ്ഥയും മെച്ചപ്പെടുത്താനും സഹായിക്കുന്നു. നിങ്ങൾക്ക് ഇഷ്ടമുള്ളതും ലളിതവുമായ വ്യായാമങ്ങൾ തെരഞ്ഞെടുക്കുക എന്നതാണ് ഇതിൽ പ്രധാനം. നടക്കുകയോ സൈക്കിൾ ചവിട്ടുകയോ പടികൾ കയറുന്നതോ പോലും മികച്ച വ്യായാമങ്ങളാണ്.
സമ്മർദം അഥവാ സ്ട്രെസ് നിയന്ത്രിക്കുക എന്നത് ഇന്നത്തെ കാലത്ത് വെല്ലുവിളിയാണെങ്കിലും ആരോഗ്യത്തിന് ഇത് അനിവാര്യമാണ്. ദീർഘകാലത്തെ മാനസിക സമ്മർദം പ്രതിരോധശേഷി കുറയ്ക്കാനും രക്തസമ്മർദം വർധിപ്പിക്കാനും കാരണമാകും. സ്ട്രെസ് ഉള്ളപ്പോൾ പലരും അമിതമായി ഭക്ഷണം കഴിക്കാനോ മധുരവും കൊഴുപ്പും അടങ്ങിയ ഭക്ഷണങ്ങൾ തിരഞ്ഞെടുക്കാനോ സാധ്യതയുണ്ട്. അതിനാൽ സമ്മർദത്തിന്റെ കാരണങ്ങൾ കണ്ടെത്തി അവ പരിഹരിക്കാൻ ശ്രമിക്കുന്നത് ആരോഗ്യത്തിൽ വലിയ മാറ്റങ്ങൾ കൊണ്ടുവരും.
ആരോഗ്യത്തിന്റെ മറ്റൊരു പ്രധാന തൂണാണ് ഉറക്കം. മുതിർന്നവർ രാത്രിയിൽ ഏകദേശം ഏഴ് മണിക്കൂറെങ്കിലും ഉറങ്ങേണ്ടതുണ്ട്. ഉറക്കക്കുറവ് രക്തസമ്മർദം, ഹൃദ്രോഗം, വിഷാദം തുടങ്ങിയ രോഗങ്ങളിലേക്ക് നയിച്ചേക്കാം. മാത്രമല്ല, ശരിയായ ഉറക്കം ലഭിക്കാത്തത് വിശപ്പ് വർധിപ്പിക്കുന്ന ഹോർമോണുകളിൽ മാറ്റം വരുത്തുകയും അനാരോഗ്യകരമായ ഭക്ഷണങ്ങളോട് ആസക്തിയുണ്ടാക്കുകയും ചെയ്യും. അതിനാൽ കൃത്യമായ സമയത്ത് ഉറങ്ങുന്ന ശീലം വളർത്തിയെടുക്കുന്നത് വലിയ ഗുണം ചെയ്യും.
അഞ്ചാമതായി ശ്രദ്ധിക്കേണ്ടത് മദ്യപാനത്തിന്റെ അളവ് കുറയ്ക്കുക എന്നതാണ്. മദ്യം ഉറക്കത്തെ തടസ്സപ്പെടുത്തുകയും അർബുദം, കരൾ രോഗങ്ങൾ തുടങ്ങിയവയ്ക്കുള്ള സാധ്യത വർധിപ്പിക്കുകയും ചെയ്യുന്നു. ആരോഗ്യകരമായ അളവ് എന്നതിലുപരി, മദ്യപാനം പാടെ ഉപേക്ഷിക്കുന്നതാണ് ശരീരത്തിന് നല്ലത്.
ചുരുക്കത്തിൽ, ആരോഗ്യം എന്നത് വെറുമൊരു ഭാരപരിശോധനയല്ല. മറിച്ച് നമ്മുടെ ദൈനംദിന ശീലങ്ങളുടെ ആകെത്തുകയാണ്. 2026-ൽ വലിയ ലക്ഷ്യങ്ങൾക്ക് പിന്നാലെ പോകാതെ, ലളിതവും പ്രായോഗികവുമായ ഇത്തരം മാറ്റങ്ങൾ ജീവിതത്തിൽ കൊണ്ടുവരുന്നത് വഴി നമുക്ക് മികച്ചൊരു ആരോഗ്യകരമായ വർഷം ഉറപ്പാക്കാം. ചെറിയ ചുവടുവെപ്പുകൾ വലിയ മാറ്റങ്ങളിലേക്ക് നയിക്കുമെന്ന് ഓർക്കുക