നിരവധി കേസുകളിൽ പ്രതിയായ കുപ്രസിദ്ധ കുറ്റവാളി ജെ.സി.ബി നാരായണ സ്വാമിക്ക് ബെംഗളൂരു ജയിലിൽ സുഖവാസം. ടി.വിയും സോഫയും മൊബൈൽ ഫോണും ഉൾപ്പെടെയുള്ള സൗകര്യങ്ങളാണ് ഇയാളുടെ സെല്ലിൽ ഒരുക്കിയിട്ടുള്ളത്. സെല്ലിലെ സുഖവാസത്തിന്റെ വീഡിയോ പുറത്തുവന്നതോടെ ജയിൽ അധികൃതർക്കെതിരെ വലിയ വിമർശനമാണ് ഉയരുന്നത്.
ഇയാൾക്ക് പ്രത്യേക ഭക്ഷണവും ജയിൽ അധികൃതർ വിതരണം ചെയ്യുന്നുണ്ട്. ജയിലിലെ പൊലീസുകാർക്ക് പണം നൽകിയാണ് സെല്ലിനുള്ളിൽ ഈ സൗകര്യങ്ങളെല്ലാം തരപ്പെടുത്തിയതെന്നാണ് ആക്ഷേപം.
വീഡിയോ വൈറലായതോടെ സംഭവത്തിൽ വിശദമായ അന്വേഷണം നടത്തുമെന്നും കുറ്റക്കാരായ പൊലീസുകാർക്കെതിരെ കർശന നടപടി സ്വീകരിക്കുമെന്നും കർണാടക ആഭ്യന്തര മന്ത്രി അരക ജ്ഞാനേന്ദ്ര പറഞ്ഞു. നേരത്തെ വി.കെ ശശികലക്കും ഇതേ ജയിലിൽ വി.ഐ.പി പരിഗണന ലഭിക്കുന്ന വീഡിയോ പുറത്തുവന്നതിനെ തുടർന്ന് വിവാദമായിരുന്നു.