ഡൽഹി: മൂന്നാം മോദി സര്ക്കാരിന്റെ മൂന്നാം ബജറ്റ് അവതരണം ലോക്സഭയിൽ തുടങ്ങി. ധനമന്ത്രി നിര്മല സീതാരാമനാണ് ബജറ്റ് അവതരിപ്പിക്കുന്നത്. ഇന്ത്യയുടെ വളർച്ചയുടെ പാതയിലാണെന്ന് ധനമന്ത്രി പറഞ്ഞു. ആഗോള പ്രതിസന്ധിക്കിടയിലും വളർച്ച നേടാനായി. ആഭ്യന്തര ഉൽപാദനം വര്ധിച്ചു. ദാരിദ്ര്യം കുറക്കാനായി. സർക്കാരിന്റെ എല്ലാ നടപടികളും പൗരന്മാരുടെ ക്ഷേമത്തിന് വേണ്ടിയാണെന്നും നിര്മല സീതാരാമൻ കൂട്ടിച്ചേര്ത്തു.
ഇതോടെ തുടര്ച്ചയായി ധനമന്ത്രിയെന്ന റെക്കോഡ് നിര്മല സീതാരാമന് സ്വന്തമായി. പന്ത്രണ്ട് ലക്ഷം വരെ വരുമാനം ഉള്ളവരെ ആദായ നികുതിയിൽ നിന്ന് കഴിഞ്ഞ തവണ ഒഴിവാക്കിയിരുന്നു. ഈ സാഹചര്യത്തിൽ ആദായനികുതിയിൽ കാര്യമായ ഇളവ് ഇത്തവണ പ്രതീക്ഷിക്കുന്നില്ല. നിയമസഭാ തെരഞ്ഞെടുപ്പു മുന്നിൽകണ്ട് ബജറ്റിൽ പ്രത്യേക പദ്ധതികൾ പ്രഖ്യാപിക്കുമെന്ന പ്രതീക്ഷയിലാണ് കേരളം ഉൾപ്പെടെയുള്ള സംസ്ഥാനങ്ങൾ.
ബജറ്റിൽ പരിഗണിക്കാനായി 29 ആവശ്യങ്ങളടങ്ങിയ കത്ത് ധനമന്ത്രി കെ.എൻ ബാലഗോപാൽ നിർമലക്ക് നൽകിയിട്ടുണ്ട്. ട്രംപ് ഉയർത്തുന്ന താരിഫ് ഭീഷണി മറികടക്കാൻ ബജറ്റിൽ എന്തുണ്ടാകും എന്നതാണ് രാജ്യം ഉറ്റുനോക്കുന്നത്.