ഡൽഹി: രാജ്യത്ത് വാണിജ്യ ഗ്യാസ് സിലിണ്ടർ വില വർധിച്ചു. ഡൽഹിയിൽ 195 രൂപയാണ് വർധിച്ചത്. വിമാന ഇന്ധനത്തിനും വില വർധിച്ചു. ഒരു മാസത്തിനുള്ളിൽ ഇരട്ടിയോളം തുകയാണ് വർധിച്ചത്. ഇതോടെ വിമാനടിക്കറ്റ് നിരക്ക് കുതിച്ചുയരും.
19 കിലോഗ്രാം വാണിജ്യ എൽപിജി സിലിണ്ടറിന്റെ വില ഡൽഹിയിൽ 2,078.50 രൂപയായി വര്ധിച്ചെന്ന് എണ്ണക്കമ്പനികളെ ഉദ്ധരിച്ച് വാർത്താ ഏജൻസികൾ റിപ്പോർട്ട് ചെയ്തു.അതേസമയം, ഇറാൻ-യുഎസ് യുദ്ധം പൊട്ടിപ്പുറപ്പെട്ട് ദിവസങ്ങൾക്ക് ശേഷം, മാർച്ച് 7 ന് അവസാനമായി പരിഷ്കരിച്ചതിന് ശേഷവും ഗാർഹിക എൽപിജി സിലിണ്ടറുകളുടെ വിലയിൽ മാറ്റമില്ല. ഡൽഹിയിൽ ഗാർഹിക എൽപിജി നിരക്ക് അവസാനമായി 14.2 കിലോഗ്രാം സിലിണ്ടറിന് 60 രൂപ വർധിപ്പിച്ചിരുന്നു. നിലവിൽ 14.2 കിലോഗ്രാം സിലിണ്ടറിന് 913 രൂപയാണ് വില.
ആഗോളതലത്തിൽ ക്രൂഡ് ഓയിൽ നീക്കത്തിന്റെ ഏകദേശം 20 ശതമാനവും കടന്നുപോകുന്ന തന്ത്രപ്രധാനമായ ഹോർമുസ് കടലിടുക്കിലെ കപ്പൽ ഗതാഗത തടസം ഇന്ത്യയുൾപ്പെടെയുള്ള രാജ്യങ്ങളിൽ വലിയ ഊർജ പ്രതിസന്ധിയാണ് സൃഷ്ടിക്കുന്നത്. നിലവിലെ തടസങ്ങൾ കാരണം ആഗോള വിപണിയിൽ എണ്ണവില കുത്തനെ ഉയരാൻ ഇത് കാരണമായിട്ടുണ്ട്. ചില ഇന്ത്യൻ കപ്പലുകൾ കടലിടുക്ക് കടന്നുപോയിട്ടുണ്ടെങ്കിലും, പൊതുവായ കപ്പൽ നീക്കം തടസപ്പെട്ടത് വിതരണ ശൃംഖലയെ ബാധിച്ചിട്ടുണ്ട്.വിതരണത്തിലെ കുറവ് അന്താരാഷ്ട്ര തലത്തിൽ ക്രൂഡ് ഓയിൽ വില വർധിക്കാൻ ഇടയാക്കി.