ന്യൂഡൽഹി: ആഗോള പ്രതിസന്ധിക്കിടയിലും ഇന്ത്യയുടെ സാമ്പത്തിക വളർച്ചയിൽ സ്ഥിരത കൈവരിച്ചുവെന്ന് സാമ്പത്തിക അവലോകന റിപ്പോർട്ട്. 2027 സാമ്പത്തിക വർഷത്തിൽ ഇന്ത്യയുടെ സമ്പദ്വ്യവസ്ഥ 6.8% മുതൽ 7.2% വരെ വളർച്ച കൈവരിക്കും. 2026 പകുതിയോടെ ലോകത്തിലെ രണ്ടാമത്തെ കയറ്റുമതി രാജ്യമായി ഇന്ത്യ മാറും. യുഎസ് താരിഫ് സമ്മർദ്ദമുണ്ടായിട്ടും ഇന്ത്യൻ സമ്പത്ത് വ്യസ്ഥ വളർന്നുവെന്നും സാമ്പത്തിക അവലോകന റിപ്പോർട്ടിൽ പറയുന്നു.
വരാനിരിക്കുന്ന സാമ്പത്തിക വർഷത്തേക്കുള്ള കേന്ദ്ര ബജറ്റിന് മൂന്ന് ദിവസം മുമ്പ് കേന്ദ്ര ധനമന്ത്രി നിർമ്മല സീതാരാമൻ പാർലമെന്റിൽ അവതരിപ്പിച്ച സാമ്പത്തിക സർവേയിലാണ് ജിഡിപി വളർച്ച രേഖപ്പെടുത്തുന്നത്. ജനുവരി 7ന് നാഷണൽ സ്റ്റാറ്റിസ്റ്റിക്സ് ഓഫീസ് പുറത്തിറക്കിയ എസ്റ്റിമേറ്റ് പ്രകാരം 2025-26 സാമ്പത്തിക വർഷത്തിൽ ഇന്ത്യയുടെ മൊത്ത ആഭ്യന്തര ഉത്പാദനം 7.4% ആയി വളരുമെന്ന് പ്രവചിച്ചിരുന്നു. സ്റ്റാറ്റിസ്റ്റിക്സ് ആൻഡ് പ്രോഗ്രാം ഇംപ്ലിമെന്റേഷൻ മന്ത്രാലയം 7.3% വളർച്ച പ്രവചിച്ചു. രാജ്യത്തിന്റെ സമ്പദ്വ്യവസ്ഥ വരും വർഷത്തിൽ എങ്ങനെ പ്രവർത്തിക്കുമെന്നതിന്റെ വിശാലമായ ചിത്രം ഈ മുൻകൂർ കണക്കുകൾ നൽകുന്നു.
ആഗസ്റ്റിൽ ഏർപ്പെടുത്തിയ ശിക്ഷാ ലെവി ഉൾപ്പെടെ, ഇന്ത്യൻ ഉൽപ്പന്നങ്ങൾക്ക് യുഎസ് 50% സംയോജിത തീരുവ ചുമത്തിയത് ഇന്ത്യൻ കയറ്റുമതിയെ നേരിട്ട് ബാധിച്ചിരുന്നു. യുക്രൈനിനെതിരെ റഷ്യ യുദ്ധം തുടരുന്ന സാഹചര്യത്തിൽ റഷ്യയിൽ നിന്ന് വിലക്കുറവിൽ എണ്ണ വാങ്ങുന്ന രാജ്യങ്ങൾക്കെതിരെ ട്രംപിന്റെ സമ്മർദ്ദ പ്രചാരണത്തിന്റെ ഭാഗമായാണ് 25% ശിക്ഷാ തീരുവ ഏർപ്പെടുത്തിയത്.