ജിന്നയുടെ കൊച്ചുമകൻ, താമസം ഇന്ത്യയിൽ; ഐപിഎൽ ടീം ഉടമ കൂടിയായ വ്യവസായിയെ അറിയാം

മുംബൈ: ബിസിനസ് ലോകത്തിലെ വളരെ പ്രധാനപ്പെട്ട ഒരു പേരാണ് നെസ് വാഡിയ. 283 വർഷം പഴക്കമുള്ള വാഡിയ ഗ്രൂപ്പിന്റെ അവകാശിയാണ് നുസ്ലി വാഡിയയുടെയും മൗറീൻ വാഡിയയുടെയും മൂത്ത മകനായ നെസ് വാഡിയ. ബോംബെ ബർമ ട്രേഡിംഗ് കോർപ്പറേഷന്റെ മാനേജിംഗ് ഡയറക്ടറും ഇന്ത്യൻ പ്രീമിയർ ലീഗ് ക്രിക്കറ്റ് ടീമായ പഞ്ചാബ് കിംഗ്സിന്റെ സഹ ഉടമയുമാണ് നിലവിൽ നെസ്.

നുസ്ലി വാഡിയയുടെയും മൗറീൻ വാഡിയയുടെയും മകനായി ജനിച്ച അദ്ദേഹം മുംബൈയിലെ ഒരു പാഴ്സി കുടുംബത്തിൽ പെട്ടയാളാണ്. വാർവിക്ക് സർവകലാശാലയിൽ നിന്ന് എഞ്ചിനീയറിംഗ് മാനേജ്‌മെന്റിൽ മാസ്റ്റേഴ്സ് പൂർത്തിയാക്കിയ ശേഷം 2001ൽ ബോംബെ ഡൈയിംഗിൽ ചേർന്നു. ഗോ എയർ, ബ്രിട്ടാനിയ, വാഡിയ ടെക്‌നോ എഞ്ചിനീയറിംഗ് സർവീസസ്, ബോംബെ ഡൈയിംഗ് തുടങ്ങിയ വിവിധ വാഡിയ ഗ്രൂപ്പ് കമ്പനികളുടെ ബോർഡുകളിൽ ഡയറക്ടറായി അദ്ദേഹം സേവനമനുഷ്ഠിക്കുന്നു.

പാകിസ്താൻ സ്ഥാപകനായ മുഹമ്മദ് അലി ജിന്നയുമായി നെസിന് അടുത്ത ബന്ധമുണ്ടെന്ന് വളരെ കുറച്ച് ആളുകൾക്ക് മാത്രമേ അറിയൂ. നെസ് വാഡിയ ജിന്നയുടെ കൊച്ചുമകനാണ്. അദ്ദേഹത്തിന്റെ മുത്തശ്ശി ദിന മുഹമ്മദ് അലി ജിന്നയുടെയും രത്തൻബായ് പെറ്റിറ്റിന്റെയും മകളായിരുന്നു. നെസ് വാഡിയയുടെ സ്വത്തിന്റെ കൃത്യമായ തുക പൊതുജനങ്ങൾക്ക് ലഭ്യമല്ലെങ്കിലും ഫോർബ്‌സിന്റെ കണക്കനുസരിച്ച് അദ്ദേഹത്തിന്റെ പിതാവ് നുസ്ലി വാഡിയയുടെ ആസ്തി 5.7 ബില്യൺ യുഎസ് ഡോളറാണ്. രാജ്യത്തെ ഏറ്റവും സമ്പന്നരായ കുടുംബങ്ങളിൽ ഒന്നാണ് വാഡിയ കുടുംബം.