പത്തനംതിട്ടയിൽ വിനോദയാത്ര പോയ ബസ് മറിഞ്ഞ് 30 വിദ്യാർഥികൾക്ക് പരിക്ക്

പത്തനംതിട്ട: പത്തനംതിട്ടയിൽ വിനോദയാത്രക്ക് പോയ ബസ് മറിഞ്ഞ് മുപ്പത് വിദ്യാർഥികൾക്ക് പരിക്കേറ്റു. കടമ്പനാട് കല്ലുകുഴിയിലാണ് അപകടമുണ്ടായത്. വാഗമണിലേക്ക് ടൂറുപോയ കൊല്ലം ഫാത്തിമ മാതാ കോളേജിലെ വിദ്യാർഥികളുടെ സംഘമാണ് അപകടത്തിൽപെട്ടത്. 

രാവിലെ 6.30ഓടെയായിരുന്നു അപകടം. 44 പെൺകുട്ടികളും 5 ആൺ കുട്ടികളും 3 അധ്യാപകരുമാണ് ബസിൽ ഉണ്ടായിരുന്നത്. കല്ലുകുഴി ജംഗ്ഷനിൽ വളവ് തിരിയവേ ബസ് നിയന്ത്രണംവിട്ട് മറിയുകയായിരുന്നു. ആരുടേയും പരിക്ക് ഗുരുതരമല്ലെന്നാണ് വിവരം. 

പരിക്കേറ്റവരെ അടൂർ താലൂക്ക് ആശുപത്രിയിൽ പ്രവേശിപ്പിച്ചു. നാട്ടുകാരും അടൂർ ഫയർഫോഴ്‌സും ചേർന്നാണ് രക്ഷാപ്രവർത്തനം നടത്തിയത്.