മുംബൈ: മുംബൈ നഗരത്തിലെ തിരക്കേറിയ ജീവിതത്തിനിടയിൽ ഒരു ഓട്ടോ ഡ്രൈവർ തന്റെ വരുമാനത്തെക്കുറിച്ച് നടത്തിയ വെളിപ്പെടുത്തൽ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. തന്റെ ഓട്ടോറിക്ഷയിൽ യാത്ര ചെയ്ത യുവാവിനോടാണ്, ദിവസം ഏകദേശം 2,500 രൂപ താൻ സമ്പാദിക്കുന്നുണ്ടെന്ന് ഡ്രൈവർ വെളിപ്പെടുത്തിയത്. ഇന്ധനച്ചെലവ് കഴിച്ച് ബാക്കിയുള്ള തുകയാണിതെന്നും അദ്ദേഹം അവകാശപ്പെടുന്നു.
ഈ കണക്കനുസരിച്ച് നോക്കുകയാണെങ്കിൽ, ഒരു മാസം മുപ്പത് ദിവസവും ജോലി ചെയ്താൽ ഏകദേശം 75,000 രൂപയോളം ഇദ്ദേഹത്തിന് വരുമാനമായി ലഭിക്കും. മുംബൈ പോലെ അവസരങ്ങളുള്ള നഗരത്തിൽ കഠിനാധ്വാനം ചെയ്യാൻ മനസുണ്ടെങ്കിൽ പണം സമ്പാദിക്കാൻ പ്രയാസമില്ലെന്നാണ് ഇദ്ദേഹത്തിന്റെ പക്ഷം. നഗരത്തിൽ പണം മഴപോലെ പെയ്യുന്നുണ്ടെന്നും അത് എങ്ങനെ നേടിയെടുക്കണമെന്ന് അറിഞ്ഞിരിക്കണമെന്നും ഡ്രൈവർ വിഡിയോയിൽ പറയുന്നുണ്ട്.
വിഡിയോ പകർത്തിയ യുവാവ് ഈ വരുമാനം കേട്ട് അമ്പരക്കുന്നതും ദൃശ്യങ്ങളിൽ കാണാം. ഉന്നത വിദ്യാഭ്യാസം നേടി ജോലിയിൽ പ്രവേശിച്ചപ്പോൾ പോലും തനിക്ക് ഇത്രയും വലിയ തുക ശമ്പളമായി ലഭിച്ചിരുന്നില്ലെന്ന് അദ്ദേഹം ആശ്ചര്യത്തോടെ പറയുന്നു. വിഡിയോ വൈറലായതോടെ, കോർപറേറ്റ് മേഖലയിൽ ജോലി ചെയ്യുന്ന പലരേക്കാളും മികച്ച രീതിയിൽ ഇത്തരം മേഖലകളിൽ ഉള്ളവർ സമ്പാദിക്കുന്നുണ്ടെന്ന അഭിപ്രായവുമായി നിരവധി പേർ രംഗത്തെത്തി.
അതേസമയം, ഈ വരുമാനത്തിന് പിന്നിലെ കഠിനാധ്വാനത്തെക്കുറിച്ചും സോഷ്യൽ മീഡിയയിൽ ചർച്ചകൾ നടക്കുന്നുണ്ട്. മുംബൈയിലെ കടുത്ത ചൂടിലും ട്രാഫിക്കിലും മണിക്കൂറുകളോളം പണിയെടുത്താൽ മാത്രമേ ഇത്തരമൊരു തുക മാറ്റിവെക്കാൻ സാധിക്കൂ എന്ന് ഒരു വിഭാഗം ചൂണ്ടിക്കാട്ടുന്നു. ഒരു വൈറ്റ് കോളർ തൊഴിലാളിക്ക് ലഭിക്കുന്ന സാമൂഹിക പദവി ഇത്തരം കഠിനാധ്വാനികൾക്ക് ലഭിക്കുന്നില്ല എന്ന കാര്യവും ഈ വാർത്തയോടൊപ്പം ചർച്ച ചെയ്യപ്പെടുന്നുണ്ട്.