തെഹ്റാൻ: ഇറാൻ നാവികസേനാ കമാൻഡർ റിയർ അഡ്മിറൽ അലിറെസ തങ്സിരി ഇസ്രായേൽ നടത്തിയ ആക്രമണത്തിൽ കൊല്ലപ്പെട്ടതായി ഇസ്രായേൽ. ഹോർമുസ് കടലിടുക്കിലെ ഇറാന്റെ സൈനിക നീക്കങ്ങൾക്ക് നേതൃത്വം നൽകിയിരുന്ന ഇസ്ലാമിക് റെവല്യൂഷണറി ഗാർഡ് കോർപ്സ് (IRGC) കമാൻഡറായിരുന്നു അലിറെസ തങ്സിരി.
മേഖലയിൽ ഇസ്രായേലും ഇറാനും തമ്മിലുള്ള സംഘർഷം പുതിയ തലത്തിലേക്ക് നീങ്ങുന്നതിനിടെയാണ് അലിറെസ തങ്സിരി കൊല്ലപ്പെട്ടതായി വാർത്ത പുറത്തുവരുന്നത്. ഹോർമുസ് കടലിടുക്ക് ഉപരോധിക്കുമെന്ന ഇറാന്റെ ഭീഷണിക്ക് പിന്നിൽ പ്രവർത്തിച്ചത് തങ്സിരിയായിരുന്നു. അദ്ദേഹത്തിന്റെ മരണം ഇറാന്റെ സൈനിക ശേഷിക്ക് വലിയ തിരിച്ചടിയാകുമെന്നാണ് വിലയിരുത്തപ്പെടുന്നത്.
സംഭവത്തെക്കുറിച്ച് ഇറാൻ ഔദ്യോഗികമായി പ്രതികരിച്ചിട്ടില്ലെങ്കിലും, ഇറാന്റെ സൈനിക കേന്ദ്രങ്ങളെ ലക്ഷ്യമിട്ട് ഇസ്രായേൽ ആക്രമണം ശക്തമാക്കിയിരുന്നു. ഇറാൻ റെവല്യൂഷണറി ഗാർഡ് കോർപ്സിന്റെ (IRGC) നാവിക വിഭാഗം തലവനായ തങ്സിരി, പടിഞ്ഞാറൻ രാജ്യങ്ങൾക്കും ഇസ്രായേലിനും എതിരെ കർക്കശമായ നിലപാടുകൾ സ്വീകരിച്ചിരുന്ന നേതാവാണ്.
ആരായിരുന്നു അലിറെസ തങ്സിരി?
ഇറാൻ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) നാവിക വിഭാഗം മേധാവിയാണ് റിയർ അഡ്മിറൽ അലിറെസ തങ്സിരി. 2018 ആഗസ്റ്റിൽ ഇറാന്റെ പരമോന്നത നേതാവ് ആയത്തുല്ല അലി ഖാംനഈയാണ് അദ്ദേഹത്തെ ഈ പദവിയിലേക്ക് നിയമിച്ചത്. ഇറാൻ-ഇറാഖ് യുദ്ധകാലം മുതൽ സൈനിക സേവനത്തിൽ സജീവമായ അദ്ദേഹം, ദീർഘകാലം നാവികസേനയുടെ ഡെപ്യൂട്ടി കമാൻഡറായും തന്ത്രപ്രധാനമായ ബന്ദർ അബ്ബാസ് മേഖലയിലെ കമാൻഡറായും സേവനമനുഷ്ഠിച്ചിട്ടുണ്ട്.
പേർഷ്യൻ ഗൾഫിലും ഹോർമുസ് കടലിടുക്കിലും ഇറാന്റെ സൈനിക സ്വാധീനം ഉറപ്പിക്കുന്നതിൽ തങ്സിരി നിർണായക പങ്ക് വഹിച്ചു. ലോകത്തെ ഏറ്റവും പ്രധാനപ്പെട്ട എണ്ണക്കടത്തു പാതയായ ഹോർമുസ് കടലിടുക്കിന്റെ നിയന്ത്രണം ഇറാന്റെ കൈകളിലാണെന്ന് അദ്ദേഹം പലപ്പോഴും അവകാശപ്പെട്ടിട്ടുണ്ട്. വിദേശ കപ്പലുകളെ നിരീക്ഷിക്കുന്നതിനും തടഞ്ഞുവെക്കുന്നതിനും നേതൃത്വം നൽകിയ അദ്ദേഹം, മേഖലയിലെ അമേരിക്കൻ നാവികസേനയുടെ സാന്നിധ്യത്തെ ശക്തമായി എതിർത്ത വ്യക്തികൂടിയാണ്.
ആധുനിക യുദ്ധതന്ത്രങ്ങളിൽ ഡ്രോണുകൾക്കും മിസൈൽ ബോട്ടുകൾക്കും വലിയ പ്രാധാന്യം നൽകിയ കമാൻഡറായിരുന്നു അദ്ദേഹം. ഇറാന്റെ നാവിക കരുത്ത് വർധിപ്പിക്കുന്നതിനായി 'മിസൈൽ നഗരങ്ങൾ' (Missile Cities) ഭൂഗർഭ അറകളിൽ നിർമിക്കുന്നതിനും ഡ്രോൺ കാരിയറുകൾ സജ്ജീകരിക്കുന്നതിനും അദ്ദേഹം മുൻകൈ എടുത്തു. പാശ്ചാത്യ രാജ്യങ്ങളുടെ ഉപരോധങ്ങളെ അവഗണിച്ച് ആഭ്യന്തരമായി വികസിപ്പിച്ച ആയുധങ്ങൾ ഉപയോഗിച്ച് നാവികസേനയെ നവീകരിക്കുന്നതിൽ അദ്ദേഹം വിജയിച്ചു.
ഭീകരപ്രവർത്തനങ്ങൾക്ക് പിന്തുണ നൽകുന്നുവെന്ന് ആരോപിച്ച് 2019ൽ അമേരിക്കൻ ട്രഷറി വിഭാഗം അദ്ദേഹത്തെ ഉപരോധപ്പട്ടികയിൽ ഉൾപ്പെടുത്തി. ഇസ്രായേലിനും അമേരിക്കയ്ക്കും എതിരെ നിരന്തരം സൈനിക ഭീഷണികൾ മുഴക്കിയിരുന്ന അദ്ദേഹം, ഇറാനിയൻ സൈനിക നിരയിലെ ഏറ്റവും സ്വാധീനമുള്ള നേതാക്കളിൽ ഒരാളായാണ് കണക്കാക്കപ്പെടുന്നത്.