ലോകത്തെ കരയിപ്പിച്ച ആ ബ്ലാക്ക് ആന്റ് ​വൈറ്റ് ചിത്രം നിക് ഊട്ടിന്റെതല്ല ?.. പേര് വെട്ടി വേൾഡ് പ്രസ്​ ഫോട്ടോ

ആംസ്റ്റർഡാം: വിയറ്റ്നാം യുദ്ധ ഭീകരത ലോകത്തിന് മുന്നിൽ തുറന്ന് കാട്ടിയത് ഒരു ബ്ലാക്ക് ആന്റ് ​വൈറ്റ് ചിത്രമായിരുന്നു. ‘നാപാം ഗേൾ’എന്ന അറിയപ്പെട്ട ആ ചിത്രമെടുത്തത് വിയറ്റ്നാമീസ് - അമേരിക്കൻ ഫോട്ടോഗ്രാഫറായ നിക് ഊട്ടെന്നായിരുന്നു ലോകം വിശ്വസിച്ചിരുന്നത്. 53 വർഷം മുമ്പെടുത്ത ആ ചിത്രം വീണ്ടും ചർച്ചയാകുകയാണ്.

യുഎസിന്റെ നാപാം ബോംബാക്രമണത്തിൽ പൊള്ളലേറ്റ വിയറ്റ്നാമീസ് പെൺകുട്ടി, നഗ്നയായി, നിരാശയോടെ കൈകൾ നീട്ടി നിലവിളിക്കുന്ന ആ ചിത്രം ലോകത്തിന്റെ നെഞ്ചുലച്ചിരുന്നു. കിം ഫുക്ക് എന്ന 9 വയസുകാരിയെ ലോകം പിന്നീട് തിരച്ചറിഞ്ഞിരുന്നു.വിയറ്റ്നാമിലെ ഒരു ഗ്രാമത്തിലെ റോഡിൽ നിന്നുള്ള ഈ ചിത്രം യുഎസ് വാർത്താ ഏജൻസിയായ അസോസിയേറ്റഡ് പ്രസിനായി ജോലി ചെയ്തിരുന്ന ഫോട്ടോഗ്രാഫറായ നിക്ക് ഊട്ടിന്റെതാണെന്നായിരുന്നു അറിയപ്പെട്ടിരുന്നത്.  1972 ജൂൺ എട്ടിനാണ് ചിത്രം പ്രസിദ്ധീകരിച്ചത്. 1973 ൽ വേൾഡ് പ്രസ് ഫോട്ടോ പുരസ്കാരവും  പുലിറ്റ്സർ സമ്മാനവും ചിത്ര​ത്തെ തേടിയെത്തി. . 

ഈ വർഷമാദ്യം പുറത്തുവന്ന ‘ദ സ്ട്രിംഗർ’എന്ന ഡോക്യുമെന്ററി ചിത്രമെടുത്തയാ​ളെക്കുറിച്ച് അന്വേഷിക്കുന്നതാണ്. ഒരു ഫ്രീലാൻസ് ഫോട്ടോഗ്രാഫറെടുത്ത ചിത്രം അസോസിയേറ്റഡ് പ്രസ് ഫോട്ടോ എഡിറ്റർ നിക് ഊട്ടിന്റെ പേരിൽ നൽകുകയായിരുന്നുവെന്നാണ് ഡോക്യൂമെന്ററി വാദിക്കുന്നത്. ഫ്രീലാൻസർ ഫോട്ടോഗ്രഫറായ നോയൻ ടാനിനെ ആണ് ചിത്രമെടുത്തതെന്നാണ് ഡോക്യുമെന്ററി വാദം. ആ ചിത്രം 20 ഡോളറിനു എപിക്കു വിൽക്കുകയായിരുന്നുവെന്നും ​നോയൻ അവകാ​ശപ്പെട്ടിരുന്നു.

ചിത്രമെടുത്തത് ആരാണെന്ന സംശയങ്ങൾ വ്യാപകമായി ഉയർന്നതിനെ തുടർന്ന് വേൾഡ് പ്രസ് ഫോട്ടോ സംഘടന ആ ചിത്രമെടുത്തതിന്റെ ക്രെഡിറ്റിൽ നിന്ന് നിക് ഊട്ടിന്റെ പേര് നീക്കിയത്. നിക് ഊട്ടിന്റെ പേരിന് പകരം ‘അറിയില്ല’ എന്നാകും ഇനിയുണ്ടാവുക. എന്നാൽ 1973 ൽ നൽകിയ ‘ഫോട്ടോ ഓഫ് ദി ഇയർ’ അവാർഡ് തിരിച്ചുപിടിക്കുന്നില്ലെന്ന്  ചീഫ് എക്സിക്യൂട്ടീവ് ജൗമാന അൽ സെയ്ൻ ഖൗരി പറഞ്ഞു. നിക് ഊട്ട് ഡോക്യൂമെന്ററിയുടെ അവകാശവാദങ്ങൾക്കെതി​രെ രംഗത്തെത്തുകയും അപകീർത്തിപരമായ നടപടിക്കെതിരെ നിയമനടപടി ആരംഭിക്കുകയും ചെയ്തിരുന്നു. വേൾഡ് പ്രസ്സ് ഫോട്ടോയുടെ തീരുമാനം ‘നിർഭാഗ്യകരവും പ്രൊഫഷണലല്ലാത്തതും’ ആണെന്നും അദ്ദേഹം പറഞ്ഞു. ചിത്രമെടുത്തത് നിക് ഊട്ടാണെന്ന് ​അസോസിയേറ്റഡ് പ്രസും വ്യക്തമാക്കി.