നൂതന 5G സാങ്കേതികവിദ്യ ആരംഭിച്ച് കുവൈത്ത്

കുവൈത്ത് സിറ്റി: നൂതന 5G സാങ്കേതികവിദ്യ ആരംഭിച്ച് കുവൈത്ത്. കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി റെഗുലേറ്ററി അതോറിറ്റി (CITRA)യാണ് ഇക്കാര്യം അറിയിച്ചു. രാജ്യത്തിന്റെ ഡിജിറ്റൽ പരിവർത്തന മേഖലയിലെ സുപ്രധാന നാഴികക്കല്ലാണിത്. ഭാവിയിൽ 6G യുടെ മുന്നേറ്റങ്ങൾക്കും ഇത് അടിത്തറ പാകും. ഈ നീക്കം ആഗോള ഡിജിറ്റൽ സമ്പദ്‌വ്യവസ്ഥയിൽ കുവൈത്തിന്റെ മത്സരശേഷി ഉയർത്തും. കൂടാതെ, ആ​ഗോള തലത്തിൽ നൂതന 5G സാങ്കേതികവിദ്യ സ്വീകരിക്കുന്ന ആദ്യ രാജ്യങ്ങളിലൊന്നായി കുവൈത്ത് മാറിയിട്ടുണ്ട്.

ആശയവിനിമയ മേഖലയിലെ "ഗുണപരമായ കുതിച്ചുചാട്ടം" എന്നാണ് സിട്രയുടെ ആക്ടിംഗ് ചെയർമാൻ ഷെയ്ഖ് അത്ബി ജാബർ അൽ-സബാഹ് നീക്കത്തെ വിശേഷിപ്പിച്ചത്. നൂതനമായ 5G നെറ്റ്‌വർക്ക് സെക്കൻഡിൽ 3 ജിഗാബൈറ്റ് വരെ അതിവേഗ കണക്ഷൻ വേഗത നൽകുമെന്നും ലേറ്റൻസി ഗണ്യമായി കുറയ്ക്കുമെന്നും അദ്ദേഹം അഭിപ്രായപ്പെട്ടു. നൂതന 5G സാങ്കേതികവിദ്യയുടെ പ്രയോജനം നേടാൻ കുവൈത്ത് പൂർണമായും സജ്ജമാണെന്നും ഇതിനായി ടെലികമ്മ്യൂണിക്കേഷൻ മേഖലയുമായി സഹകരിക്കുമെന്നും സിട്ര അറിയിച്ചു.