ഒമാനിൽ സാധനങ്ങളുടെ വില വർധിച്ചു

മസ്‌കത്ത്: ഒമാനിൽ സാധനങ്ങളുടെ വില വർധിച്ചു. 2025 ജൂണിൽ ഉപഭോക്തൃ വില കഴിഞ്ഞ വർഷത്തെ ഇതേ മാസത്തെ അപേക്ഷിച്ച് 0.82 ശതമാനം വർധിച്ചതോടെയാണിത്. നാഷണൽ സെന്റർ ഫോർ സ്റ്റാറ്റിസ്റ്റിക്‌സ് ആൻഡ് ഇൻഫർമേഷൻ (എൻസിഎസ്ഐ) പുറത്തിറക്കിയ പുതിയ ഡാറ്റയിലാണ് ഇക്കാര്യം വ്യക്തമാക്കുന്നത്.

ഏറ്റവും പുതിയ ഉപഭോക്തൃ വില സൂചിക (സിപിഐ) പ്രകാരം മൊത്തത്തിലുള്ള പണപ്പെരുപ്പത്തിൽ നേരിയ വർധനവാണ് കാണിക്കുന്നത്. വ്യക്തിഗത ഉൽപ്പന്നങ്ങളുടെയും മറ്റ് സേവനങ്ങളുടെയും ഗ്രൂപ്പിൽ 7.45 ശതമാനവും, ഗതാഗത ഗ്രൂപ്പിൽ 3.12 ശതമാനവും, റെസ്റ്റോറന്റ് - ഹോട്ടൽ ഗ്രൂപ്പിൽ 1.39 ശതമാനവും വർധനവ് രേഖപ്പെടുത്തി.

ആരോഗ്യം (0.76%), വസ്ത്രങ്ങൾ, പാദരക്ഷകൾ (0.6%), വിദ്യാഭ്യാസം (0.07%), ഭവനം, യൂട്ടിലിറ്റികൾ, ഇന്ധനം (0.02%) എന്നിവയുൾപ്പെടെ മറ്റ് മേഖലകളിൽ ചെറിയ വർധനവ് ഉണ്ടായി.

അതേസമയം, ഭക്ഷണത്തിന്റെയും മദ്യേതര പാനീയങ്ങളുടെയും വിലയിൽ 0.59 ശതമാനം ഇടിവ് രേഖപ്പെടുത്തി, പച്ചക്കറികൾ (8.06%), മത്സ്യം, സമുദ്രവിഭവങ്ങൾ (3.84%), പഴങ്ങൾ (0.45%), മദ്യേതര പാനീയങ്ങൾ (0.19%) എന്നിവയിൽ ഗണ്യമായ കുറവുണ്ടായി.

ഭക്ഷ്യ വിഭാഗത്തിൽ മൊത്തത്തിലുള്ള ഇടിവ് ഉണ്ടായെങ്കിലും വിവിധ ഭക്ഷ്യ ഉൽപ്പന്നങ്ങൾ (+3.83%), പഞ്ചസാര, മധുരപലഹാരങ്ങൾ (+3.31%), പാൽ, ചീസ്, മുട്ട (+1.84%) തുടങ്ങിയ ചില ഉപഗ്രൂപ്പുകൾക്ക് വിലക്കയറ്റം അനുഭവപ്പെട്ടു.

ദാഖിലിയ ഗവർണറേറ്റിലാണ് ഏറ്റവും ഉയർന്ന പണപ്പെരുപ്പ നിരക്ക് 1.76% രേഖപ്പെടുത്തിയത്. ദാഹിറ (1.57%), സൗത്ത് ഷർഖിയ (1.4%) എന്നീ ഗവർണറേറ്റുകളാണ് തൊട്ടുപിറകിലുള്ളത്.

മസ്‌കത്ത് ഗവർണറേറ്റ് ദേശീയ ശരാശരിയായ 0.82% വുമായി യോജിച്ചു നിൽക്കുന്നു. ഏറ്റവും കുറഞ്ഞ പണപ്പെരുപ്പം സൗത്ത് ബാത്തിനയിൽ (0.1%) നിരീക്ഷിക്കപ്പെട്ടപ്പോൾ, നോർത്ത് ഷർഖിയയിൽ 0.01% എന്ന നേരിയ പണപ്പെരുപ്പം രേഖപ്പെടുത്തി.